Zbardhet testamenti i pronarit të kampingut “AMMOS” në Finikounda të Greqisë, i cili u vra të dielën në mbrëmje së bashku me punëtorin e tij shqiptar. “Protothema" shkruan se testamenti u hartua 3 ditë para vrasjes së tij dhe 68-vjeçari ia lindje gjysmën e pasurisë nipit të tij, i cili ishte dëshmitar i vrasjes së dyfishtë.
Ai e fillon testamentin e tij me frazën: "Unë po shkruaj testamentin tim në rast vdekjeje të papritur", e cila dëshmon për frikën e tij për jetën e tij. "Nipit tim të dashur....., djalit të vëllait tim të ndjerë...., sepse e dua si fëmijën tim pasi e kam pasur nën udhëheqjen time shpirtërore që kur ishte fëmijë dhe ai nuk i ka keqkuptuar kurrë urdhrat e mia dhe gjithmonë përpiqet të më bëjë të lumtur me shumë respekt dhe dashuri, ia lë pjesën më të madhe të pasurisë sime", - pohon ai në mënyrë karakteristike.
Më pas kujdestarit të kampingut, mikut të tij shqiptar, i cili u vra me të, të dielën në mbrëmje, ai i la gjysmën e arës, të cilën e zotëronte bashkë me nipin e tij si dhe shuma të konsiderueshme në banka.
Ai e përfundon testamentin e tij me dëshirën që motra dhe djali i saj të merrnin shumat prej 100 000 eurosh i pari dhe 100 000 eurosh i dyti, ndërsa miku i tij shqiptar shumën prej 200 000 eurosh në rast se nipi i tij vendoste ta shiste pronën.
Sipas informacioneve, autoritetet policore kanë në duar edhe një testament të mëparshëm të 68-vjeçarit, i cili dyshohet se është hartuar rreth një vit më parë dhe ka mbetur i vulosur. Autoritetet besojnë se krahasimi i dy dokumenteve mund të japë përgjigje për vrasjen e dyfishtë.
Vrasja ndodhi të dielën e kaluar në mbrëmje në një kamping në Finikounda, kur autori, pasi kishte mbuluar fytyrën, hyri me forcë në recepsionin ku ndodhej pronari 68-vjeçar me kujdestarin shqiptar 60 vjeç të cilin e kishte mik e tij prej shumë vitesh.
Personi i armatosur e qëlloi pronarin me gjakftohtësi, duke e plagosur për vdekje, ndërsa më pas vrau mikun e tij, i cili u përpoq të arratisej. Në vrasjen e dyfishtë ishte i pranishëm edhe nipi i pronarit, i cili arriti të ikte.
Autoritetet po kërkojnë të gjitha provat që do t'i lejojnë të zbardhin çështjen, ndërsa vazhdojnë të marrin dëshmi që do t'i çojnë ata në identitetin e të dyshuarit kryesor. Një pronar i një stacioni karburanti në zonë dha gjithashtu një deklaratë për autoritetet, duke deklaruar se i dyshuari kryesor kaloi pranë stacionit të tij.
Pronari i stacionit të karburantit e përshkroi të dyshuarin si me lëkurë të errët, të shkurtër dhe të dobët. Siç u tha autoriteteve, ai mbante një helmetë, duke e bërë të pamundur dallimin e flokëve dhe ngjyrës së tyre.
Nipi i pronarit të kampingut përshkruan karakteristika të ndryshme, duke deklaruar se i dyshuari është me lëkurë të çelët, me flokë të verdhë dhe të drejtë, të cilët ishin të rrallë. Ai gjithashtu vlerësoi se ai është ndoshta i mitur ose shumë i ri në moshë. ©LAPSI.al
