Policia e Tiranës ka dhënë detaje për makinën tip “Peugeot" e gjetur të djegur, në Tapizë në afërsi të një impianti për përpunimin e inerteve ku brenda kishte dy armë zjarri automatike dhe një krehër.
Policia thotë se: "Nga veprimet hetimore të kryera ka rezultuar se ky automjet dyshohet të jetë përdorur nga autorët e ngjarjes së ndodhur me datë 3 tetor në rrugën “Besim Cera” në Paskuqan, ku në murin rrethues të banesës së shtetasit Q. K. (i cili banon jashtë shtetit) janë konstatuar dëmtime të shkaktuara nga përdorimi i armës së zjarrit".
"Ngjarja e ndodhur është konstatuar ditën e djeshme pas hetimeve dhe verifikimeve intensive të kryera nga grupi hetimor. Punohet intensivisht për identifikimin dhe kapjen e autorëve, si dhe për sqarimin e plotë të rrethanave të rastit. Materialet procedurale i janë referuar Prokurorisë së Tiranës, për veprime të mëtejshme" - thuhet në njoftimin e policisë. /LAPSI.al
