Kryetari i Grupit Parlamentar të opozitës, Gazment Bardhi, reagoi me tone të ashpra pas dekretit të Presidentit Bajram Begaj për shpalljen e zgjedhjeve të pjesshme në Tiranë më 9 nëntor. Bardhi e akuzoi Kreun e Shtetit se ka kryer një “puç kushtetues” duke i mohuar Erion Veliajt të drejtën e ankimit në Gjykatën Kushtetuese dhe duke u vënë, sipas tij, plotësisht nën komandën e Edi Ramës. Në reagimin e tij, Bardhi nuk kurseu asgjë, duke deklaruar se Begaj e ka rrënuar autoritetin e institucionit që përfaqëson dhe se zgjedhjet në Tiranë tashmë ndodhen në një ngërç të thellë kushtetues.
Mesazhi i Gazmend Bardhit
Asnjë surprizë nga Bajram Begaj! Ashtu siç kishim paralajmëruar, Bajram Begaj nuk është President i shqiptarëve, por një robot që komandohet nga Edi Rama. Me shkeljen e rëndë që ka kryer sot ndaj Kushtetutës, Presidenti i Republikës ka kryer një puç kushtetues sepse ka rrënuar edhe autoritetin e Gjykatës Kushtetuese të Shqipërisë dhe themelet mbi të cilat ndërtohet shteti i së drejtës.
Zgjedhjet e pjesshme në Bashkinë Tiranë janë futur në një ngërç kushtetues për shkak të aktit të sotëm të Presidentit të Republikës. Juridiksionin e shqyrtimit të ankimit ndaj VKM-së së shkarkimit nuk e cakton Edi Rama në relacion, por Kushtetuta e Republikës së Shqipërisë. Një mandat kushtetues nuk mund të ndërpritet veçse për shkaqet e parashikuara shprehimisht në Kushtetutë dhe kjo i nënshtrohet kontrollit kushtetues.
Askush në 35 vjet demokraci nuk e ka dëmtuar kaq shumë reputacionin e Kreut të Shtetit. Arsyet janë tërësisht banale: Edi Rama ka marrë peng Bajram Begajn, dhe e komandon atë njëlloj si “Diellën”!
