Në turavrapin e tij për ti qëruar hesapet me Erion Veliajn, Edi Rama e ka vënë në pozitën më të vështirë presidentin Begaj duke i kërkuar hapur të shkelë kushtetutën.
Pa kaluar as 5 ditë nga shkarkimi i kryebashkiakut, Këshilli i Ministrave i ka kërkuar zyrtarisht presidencës shpalljen e zgjedhjeve të parakohshme. Në shkresën që mban datën 30 shtator dhe firmën e sekretarit Engjëll Agaçi, së bashku me Tiranën, kërkohet shpallja e zgjedhjeve edhe për 5 bashki të tjera pa kryetar si Vlora, Berati, Mati, Cerriku dhe Tepelena. Por ndërsa për këto të fundit gjithçka duket në rregull, presidenti ka vetëm 48 orë për të marrë ose jo një vendim të paligjshëm për Tiranën.
Kjo pasi pas shkarkimit Erion Veliaj u ankua në Gjykatën kushtetuese. Dhe ky ankimim sipas nenit 115 të Kushtetutës, pezullon firmën e kryeministrit Rama për shkarkimin e tij, dhe automatikisht bllokon mundësinë e zgjedhjeve të parakohshme për Bashkinë e Tiranës deri kur gjykata të dalë me një vendim.
Sipas konstitucionalistëve në momentin që kryetari i bashkisë e ankimon vendimmarrjen e Këshillit të Ministrave për shkarkimin e tij, atëherë kjo vendimmarrje pezullohet automatikisht. Pra si shkarkimi nga Këshilli Bashkiak, po ashtu dhe vendimi i qeverisë nuk kanë asnjë efekt. Erion Veliaj vijon të jetë kryetari i bashkisë deri në një vendimmarrje përfundimtare të Gjykatës Kushtetuese. Edhe avokati Jordan Daci pohon se Erion Veliaj nuk mund të konsiderohet i shkarkuar nga detyra e kryebashkiakut të Tiranës pa një vendim përfundimtar nga Gjykata Kushtetuese.
Në një intervistë për emisionin “3D” në RTSH 1 HD, Daci theksoi se “Kushtetuta e ka fare qartë; që bërja e ankimit çon automatikisht në pezullimin e vendimit. Pra, në këtë moment që ne flasim, Erion Veliaj nuk quhet i shkarkuar dhe quhet i shkarkuar vetëm kur të shprehet Gjykata Kushtetuese.”
ÇAndi Bushati: Etapa e fundit e betejës Rama- Lali. Çfarë fshihet pas ankimimit të Veliajt?
Pra, Presidenti i Republikës është vënë në dilemën për të vepruar si një ushtar i Edi Ramës apo për të zbatuar kushtetutën. Tashmë edhe debati nëse presidenca ka marrë njoftim se procedura për shpalljen e zgjedhjeve të parakohëshme është pezulluar konsiderohet i ezauruar.
Menjëherë pasi u njoh me ngjarjen Kushtetuesja bëri një sqarim për mediat duke hedhur poshtë pretendimet e Presidencës se nuk është njoftuar ende. Sipas saj regjistrimi i kërkesës dhe caktimi i relatores është i barabartë me njoftimin. “Gjykata ka bërë publikimin e regjistrimit të kërkesës", duke konsideruar “shpalljen të e barasvlershme me njoftimin publik”, njoftoi ky institucion. Sipas kësaj logjike presidenti i Republikës do të duhej, sipas nenit 115, të pezullojë kërkesën për zgjedhje të reja dhe të presë përfundimin e gjykimit të ankesës së Erion Veliajt në Kushtetuese.
Duke folur në emër të opozitës shefi i grupit parlamentar të PD-së Gazmend Bardhi tha se nëse Begaj do të vepronte në interes të kryeministrit Rama, kjo do të përbënte një shkelje të rëndë.
Ankimi në Kushtetuese/ Erion Veliaj ngrin fushatën e PS për Tiranën
“Duhet t’i kujtojmë qytetarve se ky skenar u paralajmërua nga kreu i PD në konferencë, ku bëri me dije planin që kishte Rama për të keqpërdorur presidentin dhe shkelur Kushtetutën. Kushtetuta është e qartë, qoftë për organin që vendos për shkarkimin dhe të drejtën e ankimit nga i shkarkuari. Në mënyrë automatike, vendimi i shkarkimit pezullohet. Presidenti që është autoriteti për të shpallur zgjedhjet duhet të verifikojë procedurën para se të konstatojë ekzistencën e vakancës dhe dekretin. Presidenti s’mund të dekretojë datë zgjedhjesh".
Gjithsesi nga mënyra si po sillet dhe si po hiqet se nuk ka djeni pëer ankimimin e Veliajt duket se Presidenti do ti shpallë zgjedhjet e parakohëshme për Tiranën. Në këtë rast sipas ligjit elektoral, mbahen jo më parë se 30 ditë dhe jo më vonë se 45 ditë nga data e njoftimit të ndërprerjes së mandatit. Çka do të thotë se datat e mundshme për mbajtjen e zgjedhjeve janë 3 të dielat, 2, 9 ose 16 nëntor.
©Lapsi.al
