Pas një vonese prej më shumë se një ore, Presidenti i SHBA-së Donald Trump dhe kryeministri izraelit Benjamin Netanyahu u shfaqën për deklaratat e tyre në Shtëpinë e Bardhë.
Trump tha se ata diskutuan përfundimin e luftës në Gaza, Iranin, tregtinë, Marrëveshjet e Abrahamit, por edhe kornizën më të gjerë të "paqes në Lindjen e Mesme". "Ne jemi, të paktën, shumë afër. Dhe mendoj se kemi shkuar përtej 'shumë afër'", tha ai në mënyrë karakteristike për arritjen e një marrëveshjeje armëpushimi në Gaza. Trump e falënderoi kryeministrin izraelit "sepse ai vërtet u fut në luftë dhe bëri punën", duke theksuar se "ne bashkëpunonim mirë, siç kemi bërë me shumë vende të tjera".
Ai më pas deklaroi se "sot është një ditë historike për paqen", duke vënë në dukje se ai dhe Netanyahu diskutuan "si të përfundojnë luftën në Gaza", megjithëse, siç tha ai, "kjo është vetëm një pjesë e pamjes më të madhe".
"Le ta quajmë paqe të përjetshme në Lindjen e Mesme", shtoi presidenti amerikan, i cili falënderoi Netanyahun "për pranimin e planit".
Sipas tij vendet arabe dhe një grup vendesh myslimane do të merren me Hamasin dhe të ardhmen e anëtarëve të tij. "Nëse kjo nuk është e mundur, atëherë Izraeli rezervon të drejtën absolute për t'u kthyer.
Nëse Hamasi e refuzon planin - pasi të gjithë të tjerët e kanë pranuar atë - atëherë Netanyahu ka miratimin tim për të bërë atë që duhet të bëjë.
Kjo marrëveshje është përgjithmonë. Ne po krijojmë Bordin e Paqes, i cili do të përbëhet nga vendet arabe, Izraeli, dhe të cilin unë personalisht do ta kryesoj dhe në të cilin do të marrë pjesë edhe Tony Blair" - tha Trump.
"Nëse propozimi ynë pranohet nga Hamasi, të gjithë pengjet duhet të kthehen menjëherë ose, në rastin më të keq, brenda 72 orëve" tha Trump. /LAPSI.al
