Kryeministri në detyrë i Kosovës, Albin Kurti, ka përmendur dy arsye që, sipas tij, çuan deri tek pezullimi i dialogut të planifikuar strategjik me Shtetet e Bashkuara.
Kurti deklaroi se arsyeja e parë është fillimi i zbatimit të sundimit të ligjit në veri të Kosovës, kurse e dyta lidhet me presionin e SHBA-së për ta larguar Serbinë nga Rusia.
“E para është për shkak të fillimit të sundimit të ligjit në veri të Kosovës, ku nuk mund të bëj kompromise… SHBA-të e konsiderojnë shumë të rëndësishme ta tërheqin Serbinë nga hemisfera lindore.
Dhe ne, duke qenë të palëkundur në zbatimin e ligjit, demokracisë, sovranitetit shtetëror dhe integritetit territorial, disa politikanë dhe diplomatë në SHBA vlerësojnë se ne nuk jemi duke ndihmuar SHBA-në në shkëputjen e Serbisë nga Rusia. Por ky nuk është problemi im”, vlerësoi mes tjerash Kurti.
Kurti kritikoi edhe paraardhësit e tij në qeverisje, duke theksuar se qasja e tyre e butë nuk ka dhënë rezultate. Ai shtoi se, për faktin se ata ishin “shumë të butë” në raport me SHBA-në, tani zyrtarët amerikanë e shohin atë “pak më ekstrem” në vendimmarrje.
“Kjo është barra e paraardhësve të mi, që kanë qenë shumë të butë. Unë jam normal, por dukem pak ekstrem. Kjo është për shkak të paraardhësve të mi të cilët nuk kanë qenë normalë”, deklaroi Kurti gjatë një diskutimi me një grup të rinjsh në SHBA.
Ndryshe, raportet dypalëshe mes Prishtinës dhe Uashingtonit janë dobësuar ndjeshëm, kryesisht për shkak të bindjes së administratës amerikane se Kurti nuk ka treguar gatishmëri për bashkëpunim dhe koordnim gjatë mandatit të tij në krye të qeverisë, pavarërisht thirrjeve, rekomandimeve dhe përkushtimit amerikan ndaj Kosovës.
