Në fundjavë luhet java e 5 e Abissnet Superiore, që është, në fakt, shumë më e rëndësishme se një javë e mesit të fazës së parë të një kampionati me 4 xhiro. Elbasani e Egnatia presin konfimimin, derbi i kryeqytetit është një mundësi kthese për Tiranën e Dinamon, ndërsa me ndezjen e dritave në stadiumin e Vlorës, Garcia ëndërron t'i japë shkëndijën edhe Flamurtarit.
Të gjithë kërkojnë dicka në javën e 5 të Abissnet Superiore, me renditjen që për një pjesë nuk flet gjuhën e pritur e për të tjerë që duan të ruajnë statusin aktual, si ai Elbasani surprizues i Gvozdenovic. 10 pikë në 4 ndeshje e tani një përballje delikate me Teutën, që është ende e pathyer. Verdheblutë kanë 100% fitore në shtëpi dhe është një kredit që natyrisht ëndërrojnë ta shtrijnë sa më larg. Konfirmimin e mendon edhe Egnatia, që kërkon trisin pas dy sukseseve radhazi, por duhet ta bëjë në një zonë të minuar. Flamurtari nuk njeh ende fitoren, pankina e Garcias dridhet më shumë se kurrë dhe vlonjatët do të luajnë për herë të parë në stadiumin e tyre të rikonstruktuar pas 4 transfertash radhazi.
Lexo më tej: Dy pikë në 4 ndeshje, Garcia orët e numëruara: Flamurtari hedh sytë nga Orges Shehi
Vllaznia e Partizani nxitojnë të rikuperojnë pikë, me shkodranët që pas dy pikëve të lëna në Durrës shpresojnë, kundër Vorës, të rigjenerojnë energjitë brenda mureve të shtëpisë, në atë Loro Borici ku deri tani nuk kanë gabuar asgjë. Detyrë më e komplikuar për Milinkovic në fushën e një skuadre si Bylis që shpesh i kthehet në makth. E megjithatë, Partizani ka nevojë për pikë për të mos u parakaluar edhe nga mallkastriotët, që fitore nuk kanë por kanë barazuar 3 në katër takime.
Derbi i parë i kryeqytetit
Në fund por absolutisht jo për nga rëndësia, është derbi i parë i kryeqytetit në Superiore mes Tiranës e Dinamos, dy skuadra që duan kthesën, për të ndryshuar një kurs shqetësues. Daja ka tre ndeshje pa fitore, Bordin ka gjetur një skuadër që ishte e vazhdon të jetë e fundit me plot meritë. Ka edhe një detaj për të mos u anashkaluar. Vllaznia kthehet në shtëpi, Elbasani gjithashtu, Flamurtari luanë të parën e këtij sezoni në Vlorë, me drita për më tepër e deri është gjithnjë derbi, në cilëndo situatë: ajo që pritet janë tifozët që kanë shumë për të përjetuar në javën e 5 të kampionatit.
JAVA 5
27.09. 16:00 Bylis - Partizani
27.09. 16:00 KF Tirana - Dinamo
27.09. 19:00 AF Elbasani - Teuta
28.09. 19:00 Flamurtari - Egnatia
28.09. 19:00 Vllaznia - Vora
