Juventus dhe Atalanta barazojnë në Stadium dhe humbasin të dyja nga dy pike. Përfundon 1-1 Juventus-Atalanta, ndeshja e madhe e javës së pestë të Serie A: në pjesën e dytë Cabal i përgjigjet avantazhit të Sulemana. Një vështrim te renditja: bardhezinjtë mbeten përkohësisht të dytët me -1 nga Napoli dhe +2 nga Milani, që nesër përballen në “San Siro”.
Bardhezinjtë dominojnë pjesën e parë në aspektin e zotërimit dhe të rasteve, madje godasin edhe një shtyllë në fillim me Kalulu, por ndëshkohen pikërisht në fund të pjesës nga një aksion personal i Sulemana.
Lexo më tej: Comolli, administratori i ri i deleguar i Juventus: ndryshon edhe roli i Chiellini
Në pjesën e dytë Tudor revolucionarizon sulmin, por nuk gjen përgjigje të mëdha; ndeshja shkon pa tronditje të veçanta deri në minutën e 78’, kur një gabim i Kossounou mbi krosimin e Joao Mario i hap rrugë golit të parë me fanellën bardhezi të Cabal, që sapo kishte zëvendësuar të dëmtuarin Bremer. Përjashtimi me karton të kuq i De Roon për shkak të dy kartonëve të verdhë e shndërron fundin në një rrethim të vërtetë të zonës bergamaske, por rezultati nuk ndryshon. Për Juventus ky është barazimi i tretë radhazi mes kampionatit dhe Champions, që e vendos në rrezik për t’u kaluar në renditje nga Milan dhe Roma.
Dëmtimi i Bremer
Pas alarmit të rremë të ditëve të kaluara, këtë herë alarmi në shtëpinë e Juventusit është real. Gleison Bremer u detyrua të kërkonte zëvendësim në fund të Juventus-Atalanta për një problem fizik dhe në minutën e 76-të doli duke i lënë vendin Cabal-it (që pak më pas gjeti golin e barazimit). Gjendja e brazilianit do të vlerësohet në orët e ardhshme dhe Tudor shpreson, sepse në ndeshjet e para të sezonit Bremer tashmë ka treguar se është i pazëvendësueshëm për mbrojtjen bardhezi.
