Real Madrid ndryshon emrin e stadiumit: nuk do të quhet më “Santiago Bernabeu”

Pas rikonstruksionit avangardist, “Santiago Bernabeu” do të ndryshojë gjithashtu emër duke filluar nga ndeshja e ardhshme. Nuk bëhet fjalë për një revolucion të diktuar nga nevoja sponsorësh, siç ndodh gjithmonë, por për një thjeshtim të dëshiruar nga Real Madrid për të arritur edhe më shumë tifozë dhe për t’u bërë i dallueshëm me shumë thjeshtësi në mbarë botën. Ndryshimi tashmë ka ndodhur dhe treguesi i parë ka qenë vendosja e re e shkronjave në pjesën e jashtme të stadiumit, i cili nga sot do të quhet thjesht “Bernabeu”. Klubi ka vendosur të ruajë dedikimin e impiantit për ish-lojtarin dhe presidentin nga viti 1943 deri në 1978, por të mbajë vetëm mbiemrin e tij për arsye marketingu.

Emri i ri i stadiumit të Real Madrid

Shkronjat e reja janë vendosur mbi fasadë, me gjithë pakënaqësinë e një pjese të gjerë të tifozërisë që është treguar kundër këtij ndryshimi. Duke filluar nga ndeshja e ardhshme, stadiumi i Real Madrid do të quhet vetëm “Bernabeu”, duke hequr dorë nga emri “Santiago” i ish-presidentit të cilit i është kushtuar. Nuk është një lëvizje që ka mbledhur konsensusin e të gjithëve: shumë mbështetës të Blancos e kanë parë si një tradhti të vërtetë nga ana e Florentino Perez, i cili sipas tyre po braktis dalëngadalë traditat e klubit për të ndjekur vetëm ligjet e marketingut, duke harruar historinë. Ndryshimi në fakt është minimal, por pas tij qëndrojnë motive të mëdha të lidhura me sponsorët, reklamën dhe mbi të gjitha me pasionantët që vijnë nga jashtë. Me këtë lëvizje Real Madrid ka për qëllim të jetë më i arritshëm për të gjithë, duke e shkurtuar emrin e stadiumit të tij në një fjalë të vetme, të lehtë për t’u mbajtur mend dhe edhe për t’u shqiptuar. Është pjesë e planit të shoqërisë për t’u vendosur si pikë referimi në çdo pikëpamje, jo vetëm atë futbollistike, sidomos sepse impianti do të jetë vend i koncerteve ndërkombëtare shumë të pritura në vitet e ardhshme.

? Santiago Bernabéu ? pic.twitter.com/N9rvEJ1BAj

— Real Madrid C.F. (@realmadrid) April 20, 2025