Wade Robson dhe James Safechuck, dy burrat që akuzojnë Michael Jackson për abuzim seksual kur ishin fëmijë, po kërkojnë 400 milionë dollarë dëmshpërblim nga kompanitë e ish-këngëtarit, sipas dokumenteve të reja gjyqësore.
Shifra u zbulua në një dosje gjyqësore të depozituar më 15 shtator, në kuadër të një mosmarrëveshjeje mes Paris Jackson dhe përfaqësuesve të pasurisë së babait të saj, lidhur me pagesën e tarifave ligjore në këtë çështje .
Sipas dokumenteve të siguruara nga Us Weekly, ekzekutorët e pasurisë së Jackson, John Branca dhe John McClain, theksojnë se mospagimi i këtyre tarifave mund të ketë pasoja të rënda:
“Nëse pasuria nuk i paguan tarifat ligjore, do të detyrohet të dorëzohet përballë padive, ku janë parashikuar intervista, dëshmi dhe procese të shumta në muajt në vijim.”
Robson, tani 43 vjeç, e paditi për herë të parë pasurinë dhe kompanitë MJJ Productions Inc. dhe MJJ Ventures Inc. në vitin 2013, duke pretenduar se ishte abuzuar seksualisht nga Jackson nga mosha 7 deri në 14 vjeç.
Safechuck, sot 47 vjeç, ngriti një padi të ngjashme në vitin 2014, duke pretenduar se Jackson e kishte ngacmuar seksualisht pas një reklame të përbashkët për Pepsi, kur ishte vetëm 10 vjeç.
