Dinamo nuk arriti të gjejë fitoren edhe kundër Bylis, në javën e katërt të kampionatit, edhe pse luajti me një lojtar më shumë pas kartonit të kuq të marrë nga Peralta. Rasti i dytë radhazi, në të cilin blutë luajnë në superioritet numerik dhe nuk arrijnë të imponohen. E këtë herë për fatin e Dajës erdhi një pikë, ndryshe nga ndeshja me Teutën, në të cilën pësoi humbjen e dytë radhazi.
Praktikisht rezultatet nuk janë ato që shpresonte Dinamo, jo pas performancës së bërë në Conference League. Vetëm një pikë në tre ndeshjet e fundit dhe tekniku që ende jeton me lavdinë e korrik-gushtit, gjen justifikimin te zgjedhjet që vetë ai i bëri: “Për ta nisur nga pjesa e parë, ishim të detyruar të bënim rotacion, duke futur 3-4 lojtarë për t’i dhënë freski ekipit. Rezultoi vetëm Maliqi pozitiv në këto ndërrime, ndonëse janë të rinj ata që kishim futur. Nuk bëmë një pjesë të parë të mirë, më shumë u munduam të kontrollonim e të mos pësonim".
Lexo më tej: Kotobelli dënon Dajën: Teuta mposht Dinamon me një goditje në portë e shumë polemika
Daja ankohet për tre ndeshje në një javë, por është një ngarkesë që nuk është se duhet të ndihet në këtë fillim kampionati, aq më tepër që Dinamo ka bërë fazën përgatitore më herët dhe tani duhet të jetë në pikun e energjive e jo të ndjejë lodhjen. Tekniku edhe mund të justifikohet, por ndërkohë renditja avancon dhe Elbasani e ka krijuar një 6 pikësh avantazh vetëm në 4 ndeshje.
