Ushtria amerikane tha të premten se kishte vrarë një militant të Shtetit Islamik (ISIS) në një bastisje në Siri që sipas saj “kërcënonte drejtpërdrejt tokën amerikane”.
SHBA-të mbajnë baza në Siri dhe shpesh nisin operacione kundër asaj që e përshkruajnë si fortesat e fundit të xhihadistëve për të parandaluar rigjallërimin e ISIS-it në rajon.
Omar Abdul Qader, i cili u vra dje, “ishte një anëtar i ISIS-it që kërkonte në mënyrë aktive të sulmonte Shtetet e Bashkuara”, thuhet në një deklaratë të lëshuar nga Komanda Qendrore e SHBA-së.
“Vdekja e tij pengon aftësinë e organizatës terroriste për të planifikuar dhe kryer sulme kundër amerikanëve ose partnerëve tanë”, vazhdoi deklarata e CENTCOM-it.
Kjo është bastisja e dytë, që është raportuar se është kryer nga forcat amerikane në më pak se dy muaj. Edhe ai i mëparshmi, në fund të korrikut, kishte në shënjestër një anëtar të ISIS-it.
Kjo organizatë pushtoi zona të gjera në vitin 2014, pjesë të mëdha të Sirisë dhe Irakut, përpara se të shihte shembjen e “kalifatit” të saj nën sulme nga drejtime të shumta, kryesisht në territorin sirian nga një koalicion ndërkombëtar anti-xhihadist i udhëhequr nga luftëtarët kurdë, në mes të një lufte civile.
Megjithatë, besohet se ISIS vazhdon të ketë disa qeliza të fjetura, veçanërisht në zonat e shkretëtirës siriane dhe ende po kryen sulme.
