Tre avionë luftarakë rusë të tipit MiG-31 kanë shkelur hapësirën ajrore të Estonisë, duke alarmuar forcat ajrore të NATO-s në rajon. Sipas Politico, avionët rusë janë përballur dhe më pas janë zmbrapsur nga avionë F-35 të Forcave Ajrore Italiane, të dislokuar në kuadër të misionit të Aleancës për mbrojtjen e hapësirës ajrore të Baltikut.
Avionët MiG-31, të cilët janë interceptues të avancuar me kapacitet për të mbajtur raketën hipersonike ruse Kinzhal, dyshohet se ishin drejtuar në drejtim të kryeqytetit estonez, Tallinn, përpara se të ndaloheshin nga përgjigjja e menjëhershme e avionëve italianë. Ky incident vjen në një kohë tensionesh të shtuara mes NATO-s dhe Rusisë, ndërsa vendet baltike mbeten një pikë strategjike dhe e ndjeshme në kufijtë lindorë të Aleancës.
Ushtria ruse nuk ka bërë ende asnjë koment publik mbi këtë incident. Tensionet midis NATO-s dhe Rusisë janë rritur që prej nisjes së pushtimit të plotë të Ukrainës nga Moska në vitin 2022. Situata është përshkallëzuar ndjeshëm edhe gjatë javës së fundit, pasi Polonia dhe Rumania, të dyja anëtare të NATO-s, raportuan shkelje të hapësirës së tyre ajrore nga dronë rusë.
