Izraeli ka nisur një operacion me shkallë të gjerë, duke goditur rëndë qytetin e Gazës gjatë natës, ndërsa kryeministri Benjamin Netanyahu konfirmoi se është nisur “një operacion i fuqishëm” në Rrip.
Kjo vjen mes raporteve të pakonfirmuara nga Jerusalem Post dhe faqja amerikane e lajmeve Axios, të cilat thonë se Izraeli ka nisur ofensivën e tij tokësore për të pushtuar të gjithë qytetin.
Sipas BBC, Netanyahu thotë se Qyteti i Gazës është bastioni i fundit i madh i Hamasit dhe është zotuar ta marrë atë nën kontroll. Plani për ta bërë këtë ka shkaktuar kritika ndërkombëtare.
Ndërkohë, një komision hetimor i Kombeve të Bashkuara ka thënë se Izraeli po kryen gjenocid kundër palestinezëve në Gaza.
Ministria e Jashtme e Izraelit e hedh poshtë kategorikisht raportin, duke e cilësuar atë si “të shtrembëruar dhe të rremë”.
Gazetarët vendas thonë se ka pasur pothuajse vazhdimisht sulme ajrore izraelite, artileri dhe armë zjarri në qytetin e Gazës.
“Mbrëmë ishte një nga netët më të vështira”, thotë Imad, një banor i qytetit të Gazës.
Ai tregon për BBC se si kishte parë “bomba kudo” që synonin shumë ndërtesa. Tymi dhe zjarri, thotë ai, ishin “të qarta” në qiell.
“Tinguj shpërthimesh mund të dëgjohen nga pjesë të ndryshme të Rripit”, thotë ai. “Situata është vërtet e keqe… nuk jemi optimistë, por le të shpresojmë të paktën”, thotë Imad.
