Kina pritet të inaugurojë këtë muaj urën Huaijiang, e cila do të jetë më e larta në botë. E vendosur në një lartësi prej 624 metrash mbi tokë, gati dyfishi i lartësisë së Kullës Eiffel, ura pritet të sjellë ndryshime të mëdha në jetën e banorëve të provincës Guizhou.
Ky projekt tejkalon rekordin e mëparshëm të vendit me urën Beipanjiang, e cila arrin në një lartësi prej 565 metrash.
Ura e re shtrihet në një gjatësi prej 2.892 metrash dhe kalon mbi një gryke të thellë, të njohur nga vendasit si “çarja e tokës”.
Përfundimi i saj pritet të shkurtojë ndjeshëm kohën e udhëtimit përgjatë lumit Beipan, midis krahinave Guanling dhe Zhenfeng, që kanë një popullsi të përbashkët prej rreth 600 mijë banorësh, nga dy orë në vetëm dy minuta.
Projekti ka nisur ndërtimin në vitin 2022 dhe, sipas agjencisë shtetërore të lajmeve Xinhua, ura ka kaluar me sukses një provë pesëditore ngarkese në fund të muajit të kaluar.
Një nga elementët më mbresëlënës të urës është ashensori transparent me një lartësi prej rreth 213 metra, i cili do t’u ofrojë vizitorëve pamje të jashtëzakonshme të zonës përreth.
Ura përfshin gjithashtu një shteg prej gjysmë milje me dysheme prej xhami, i dedikuar për këmbësorët.
Megjithatë, pavarësisht përparimeve të mëdha në teknologji dhe ndërtim, Kina përballet ende me sfida në fushën e sigurisë. Në të kaluarën janë shënuar aksidente në projekte infrastrukturore, me rastin më të fundit kolapsin e një ure në provincën Qinghai, ku humbën jetën 12 punëtorë.
