Presidenti francez Emmanuel Macron ka zgjedhur ministrin 39-vjeçar të Mbrojtjes, Sébastien Lecornu, një mbështetës të flaktë të tij, si kryeministrin e ri në vendin e François Bayrou. Kjo u bë e ditur nga një njoftim për shtyp nga Pallati Elize. Këtë mëngjes, François Bayrou u largua nga Pallati Elize pasi dha dorëheqjen si kryeministër para Presidentit Emmanuel Macron, duke i hapur rrugën emërimit të pasardhësit të tij.
Takimi me Macron zgjati rreth 1 orë e gjysmë. Për momentin, Bayrou mbetet kryeministri në largim për të menaxhuar çështjet aktuale, në pritje të emërimit të një pasardhësi nga Macron, i cili do të jetë kryeministri i pestë francez që nga fillimi i mandatit të dytë të presidentit në vitin 2022.
Xavier Bertrand, deputeti republikan, emri i të cilit ishte përmendur vazhdimisht në orët e fundit si një pasardhës i mundshëm i François Bayrou, përjashtoi nominimin e tij për kryeministër në një takim të liderëve të partisë. Ai gjithashtu siguroi se Ministri i Mbrojtjes Sébastien Lecornu është zgjedhja e Macron për postin e kryeministrit. Duke folur me liderët e partisë së tij, sipas BFM TV, Bertrand shtoi se "Lecornu tani është i zënë duke formuar qeverinë e tij".
LEXO EDHE: Sebastien Lecornu, njeriu në hije që mund të bëhet kryeministri i ri i Francës
Ministri i Brendshëm francez Bruno Retailleau tha se vendi "ka nevojë shumë shpejt për një kryeministër" duke pasur parasysh "rrezikun e trazirave" në demonstratat e planifikuara për shtator, duke filluar me protestën "Blloko gjithçka" të planifikuar për nesër. Retailleau, i cili është gjithashtu president i Partisë Republikane, beson se emërimi i një kryeministri është "urgjent" sepse "nuk duhet të ketë një pozicion të lirë" në prag të demonstratave dhe duke pasur parasysh "një muaj shtatori që favorizon të gjitha llojet e çrregullimeve".
"Na duhet një kryeministër shumë shpejt në mënyrë që pushteti të mund të shihet. Kjo është me rëndësi të madhe, përfshirë ruajtjen e rendit", shtoi Retailleau para gazetarëve. "Ne përsërisim", përfundoi ai, "se është e pakonceptueshme për ne që Presidenti i Republikës të zgjedhë një kryeministër socialist". ©LAPSI.al
