Kryeministri francez, François Bayrou, do të dorëzojë dorëheqjen sot pasi humbi votëbesimin që e ka zhytur Francën në kolaps qeveritar dhe krizë politike.
Emmanuel Macron tha se do të emërojë një kryeministër të ri në ditët në vijim, i cili më pas do të duhet të formojë një qeveri të re. Ky do të jetë kryeministri i tretë francez brenda një viti, dhe detyra e tij e parë do të jetë sfida madhore e arritjes së një marrëveshjeje për buxhetin në një parlament të përçarë.
Rreth 11,000 protestues u mblodhën përpara bashkive në gjithë Francën të hënën në mbrëmje për të festuar largimin e Bayrou, duke e quajtur tubimin “Bye bye Bayrou”. Shumë prej tyre e shfrytëzuan rastin edhe për t’u organizuar për një ditë protestash të mërkurën, e cila është pagëzuar me emrin: “Bllokoni gjithçka”. Rreth 80,000 policë do të mobilizohen për protestat, ku priten bllokime rrugësh dhe depozita karburanti.
Që prej zgjedhjeve të parakohshme të thirrura vitin e kaluar, parlamenti është ndarë në tre blloqe, të majtë, qendër dhe të djathtë ekstreme, pa asnjë shumicë absolute. Është e paqartë se cili kryeministër mund të arrijë konsensus për buxhetin pa u përballur me një rrëzim të ngjashëm. Bayrou, 74 vjeç, qëndroi vetëm nëntë muaj në detyrë përpara se të rrëzohej mbi buxhetin jopopullor të uljes së borxhit. Para tij, i djathti Michel Barnier kishte qëndruar vetëm tre muaj, po ashtu i rrëzuar mbi buxhetin.
Gabriel Attal, ish-kryeministër dhe kreu i centristëve të Macron, tha për radion France Info se Franca po kalon një “spektakël absolutisht tronditës” të paqëndrueshmërisë, ku “qeveria bie çdo tre deri në gjashtë muaj”. Ai shtoi: “Duhet të dalim nga ky spiral”, duke theksuar se duhet të arrihet një kompromis mes të gjitha blloqeve politike përpara se të emërohet kryeministri i ri.
Agence France-Presse, duke cituar një burim pranë Macron, raportoi se prirja personale e presidentit mund të jetë të emërojë një ministër të gjatë në detyrë, të besuar nga grupimi i tij centrist, si ministrin e drejtësisë Gérald Darmanin, ose ministrin e mbrojtjes Sébastien Lecornu, të dy me prapavijë nga e djathta. “Në fund ai do të qëndrojë në zonën e tij të rehatisë”, tha një ish-ministër.
Lexo më tej: Sebastien Lecornu, njeriu në hije që mund të bëhet kryeministri i ri i Francës
Megjithatë, Darmanin dhe Lecornu mund të perceptohen si tepër të djathtë për t’u pranuar nga e majta. Një pakt me socialistët shihet si një rrugëdalje e mundshme nga ngërçi.
Një opsion mund të jetë një figurë e majtë por jo anëtare e Partisë Socialiste, që do të ishte e pranueshme edhe për centristët e Macron, si p.sh. Bernard Cazeneuve, ish-kryeministër dhe njëherë anëtar i socialistëve.
Një tjetër emër i përfolur është ministri i financave, Eric Lombard, ish-bankar dhe gjithashtu ish-anëtar i Partisë Socialiste.
©Lapsi.al
