Rusia ka kufizuar përdorimin e WhatsApp dhe Telegram në vend, duke ndërprerë shërbimet e thirrjeve për miliona përdorues dhe duke promovuar në mënyrë agresive një aplikacion të ri të miratuar nga shteti, “Max”, i cili do të jetë i parainstaluar në të gjitha pajisjet e reja duke nisur nga 1 shtatori.
Kufizimet ndaj WhatsApp dhe Telegram u vendosën nga Roskomnadzor, rregullatori shtetëror i medias, në mes të gushtit.
Ky vendim përkon me lansimin e aplikacionit Max, i zhvilluar nga kompania VK, e lidhur ngushtë me Gazprom dhe rrethin e ngushtë të Vladimir Putinit, përmes miliarderit Yuri Kovalchuk.
“Max” synon të bëhet një super-aplikacion me funksione të komunikimit, shërbimeve qeveritare dhe bankare – një model i ngjashëm me WeChat-in kinez.
WhatsApp dhe Telegram janë aplikacionet më të përdorura në Rusi, me përkatësisht 97 dhe 90 milionë përdorues. Ato janë jetike për komunikim, sidomos në zonat e largëta me akses të kufizuar në internet.
Censura e re është parë si përpjekje për kontroll total të komunikimit, duke përfshirë monitorimin e thirrjeve, mesazheve dhe lidhjeve ndërpersonale.
“Autoritetet nuk duan që ne, njerëzit e zakonshëm, të ruajmë asnjë lloj lidhjeje apo mbështetjeje”, tha Marina, një shkrimtare nga Tula, duke kërkuar anonimatin për shkak të frikës nga ndëshkimi.
Politika e privatësisë e Max-it lejon ndarjen e të dhënave me autoritetet dhe palë të treta, duke ngritur shqetësime serioze për mbikëqyrje shtetërore dhe rrjedhje të mundshme të të dhënave personale.
