“Rusia do ta konsiderojë çdo kontingjent ushtarak në territorin ukrainas një objektiv legjitim për t’u goditur”. Kështu u shpreh Presidenti rus Vladimir Putin gjatë seancës plenare të Forumit Ekonomik Lindor në Vladivostok. Shefi i Kremlinit tha “lidhur me kontingjentet e mundshme ushtarake në Ukrainë, kjo është një nga arsyet kryesore për përfshirjen e Ukrainës në NATO”. “Prandaj, nëse trupat shfaqen atje, veçanërisht tani, gjatë kryerjes së operacioneve ushtarake, ne nisemi nga supozimi se këto do të jenë objektiva legjitime për shkatërrimin e tyre”, tha ai.
Putin mohoi çdo mundësi për marrëveshje mes Moskës dhe Kievit duke paralajmëruar vazhdimin e konfliktit ushtarak, pavarësisht thirrjeve të perëndimit dhe paralajmërimeve amerikane për sanksione të ashpra.
“Një marrëveshje midis Rusisë dhe Ukrainës mbi çështjet kyçe që lidhen me konfliktin do të jetë praktikisht e pamundur. Arritja e një marrëveshje me palën ukrainase mbi çështjet kyçe do të jetë praktikisht e pamundur, edhe nëse ekziston vullneti politik”, tha ai.
Putin tha se kishte arritur një dakordësi me homologun e tij amerikan Donald Trump për të mbajtur kontakte telefonik nëse është e nevojshme. “Nëse është e nevojshme, ne (Unë dhe Trump) mund të telefonojmë njëri-tjetrin, të lidhemi, të flasim. Ai e di që unë jam i hapur për këto biseda, dhe kështu është edhe ai”, vuri në dukje Putin.
Ne jemi të hapur për bashkëpunim me të gjitha vendet në botë, shtoi ai, para së gjithash me ato që duan të punojnë me ne, me miqtë tanë.
Shumë kompani që janë larguar nga tregu rus mezi presin të kthehen, tha Putin, duke shtuar se “për arsye politike, shumë kompani evropiane janë larguar, është e vërtetë, duke pësuar humbje”. “Por ne mbajmë kontakt: shumë mezi presin që të hiqen të gjitha kufizimet e ndryshme politike dhe do të donin të ktheheshin në çdo kohë. Ne nuk i kthejmë shpinën askujt. Nuk kemi dëbuar askënd; kushdo që dëshiron mund të kthehet gjithmonë, por vetëm sipas kushteve që janë krijuar në këtë moment”.
