Nga kapiten i ekipi kombëtar në i padëshiruar ose në rastin më të mirë i gjashti në hierarkinë e portierëve. Kjo është parabola e Etrit Berishës, që ka parë të humbasë jo vetëm vendin si titullar mes kuqezinjve, por të kalohet përveç Strakoshës edhe nga Alen Sherri, Marjo Dajsinani, Elhan Kastrati e madje edhe Simon Simoni. Ky i fundit nuk luan fare me Kaiserslautern në Bundesliga 2 e megjithatë është thirrur për të zëvendësuar Kastratin e dëmtuar.
Do të ishte e sikletshme në fakt të thirrej portieri 36 vjeçar i Haecken, që me pritjet e tij e ka udhëhequr skuadrën suedeze në fazën kampionat të Conference League, pasi Sylvinho e kishte anashkaluar me Dajsinanin, pavarërisht se Sherri ishte dëmtuar. Për nivelin e portierit që është Berisha sigurisht që meriton respekt, por dicka ka ndodhur në raportet mes tij dhe ambjentit të kuqezinjve, gjë që praktikisht i ka mbyllur dyert e Kombëtares e nuk bëhet fjalë për moshën.
Largohet Kastrati, vjen Simoni
Ndërsa Kombëtarja shqiptare ka vijuar përgatitjet për ndeshjet e shtatorit në ditën e dytë në kampin stërvitore në Malaga të Spanjës, departamenti i Komunikimit në FSHF bën me dije se trajneri Silvinjo ka vendosur të ftojë në skuadër portierin e Kombëtares U-21, Simon Simoni, pasi Elhan Kastrati nuk do të jetë i gatshëm për arsye dëmtimi.
Kastrati, i cili ka një dëmtim në gju, është paraqitur në grumbullim, ku i është nënshtruar analizave dhe vizitave nga stafi mjekësor, që ka konkluduar se futbollisti nuk mund të jetë i gatshëm për ndeshjet me Gjibraltarin e Letoninë dhe se ka nevojë për trajtim mjekësor. Simoni do të mbërrijë në kampin kuqezi në orët në vazhdim dhe do të jetë në dispozicion të trajnerit Silvinjo për miqësoren ndaj Gjibraltarit dhe ndeshjen e kualifikueseve të Botërorit 2026 ndaj Letonisë në Tiranë.
Mbërrijnë Çokaj e Shpendi
Sa i përket grupit, kanë mbërritur gjatë ditës Enis Çokaj dhe Cristian Shpendi, të cilët janë stërvitur rregullisht me skuadrën. Seanca stërvitore ka zgjatur pak më shumë se një orë dhe i gjithë grupi gëzon formë të mirë. Ditën e nesërme (e mërkurë) në ora 17:00 do të jetë konferenca zyrtare e trajnerit Silvinjo, ndërkohë që në ora 18:00 do të zhvillohet seanca zyrtare stërvitore.
Shqipëria do të luajë më 4 shtator një miqësore ndaj Gjibraltarit në transfertë, me sfidën që nis në ora 18:00, ndërsa më datë 9 shtator kombëtarja do të presë Letoninë në sfidën e kualifikueseve që do të zhvillohet në stadiumin “Air Albania” dhe nis në ora 20:45.
