Një tjetër vendim i administratës së presidentit të SHBA-ve, Donald Trump është pezulluar nga gjykatat vendase. Kësaj radhe bëhet fjalë për depotimin për në vendin e origjinës të gati 700 fëmijëve të mitur të pashoqëruar me prindër nga Guatemala.
Ka qenë gjyqtarja Sparkle L Sooknanan, e emëruar në detyrë nga ish-presidenti Joe Bien, e cila hapi ditën e djeshme një seancë dëgjimore duke pezulluar fluturimet e parashikuara nga presidenti për të dërguar jashtë Amerikës fëmijët guatamalanë.
Avokatët e të paktën 10 fëmijëve guatemalas të moshave 10 deri më 17 vjeç, e kanë cilësuar këtë vendim si të paligjshëm, ndërsa avokatët qeveritarë kanë argumentuar qëndrimin e tyre se fëmijët e mitur nuk po dëbohen, por po ribashkohen më familjarët me kërkesë të prindërve apo kujdestarëve të ligjshëm.
Në aeroportin kufitar në Harlingen të Teksasit, skena e ngjarjeve të dielën në mëngjes ishte padyshim aktive. Autobusë që transportonin emigrantë u ndalën në pistë, ndërsa grupe agjentësh federalë lëviznin shpejt midis automjeteve dhe avionëve që prisnin.
Makinat e policisë rrethonin perimetrin dhe oficerët e rojet e sigurisë i shtynin gazetarët larg nga gardhet me zinxhirë që rrethonin fushën. Në pistë, avionët qëndronin me motorë të fikur, ekipet tokësore bënin përgatitjet e fundit sikur nisjet mund të vinin në çdo moment, të gjitha ndërsa beteja në sallën e gjyqit zhvillohej qindra milje larg në Uashington.
Ndërkohë qeveria njoftoi se të gjithë fëmijët e planifikuar për të dëbuar nga Amerika në drejtim të Guatemalës, janë zbritur nga avionët dhe se janë kthyer në Zyrën e Zhvendosjes së Refugjatëve, ku pritet të qëndrojnë deri në përfundim të procesit ligjor.
Sipas një letre të dërguar të premten nga senatori Ron Ëyden i Oregonit, administrata Trump arriti një marrëveshje me Guatemalën që do të lejonte që fëmijët e pashoqëruar të ktheheshin në vend dhe planifikoi të fillonte deportimet këtë fundjavë. Qeveria e Guatemalës kishte thënë se ishte gati t'i pranonte ata.
Melissa Johnston, drejtoresha e programit të Zyrës së Zhvendosjes së Refugjatëve për fëmijët e pashoqëruar, i dërgoi një email stafit të enjten duke kërkuar ndalimin e lirimit të gjithë fëmijëve guatemalanë, përveç atyre që sponsorizohen nga prindërit ose kujdestarët ligjorë në SHBA, sipas një kopjeje të shqyrtuar nga Reuters dhe një nga ish-zyrtarët.
Avokatët e fëmijëve guatemalas thanë se qeveria amerikane nuk ka autoritetin për të larguar fëmijët dhe po i privon ata nga procesi i rregullt ligjor duke i penguar ata të ndjekin kërkesat për azil ose lehtësim për imigracionin. Shumë prej tyre kanë raste aktive në gjykatat e imigracionit, sipas dosjes gjyqësore të avokatëve në Uashington.
