Adrien Rabiot do të jetë një lojtar i ri i Milan dhe pritet të bëjë debutimin e tij me fanellën kuqezi më 14 shtator kundër Bolonjës së Jonathan Rowe, lojtari me të cilin ishte protagonist i sherrit në Marsejë dhe që çoi klubin francez t’i nxirrte të dy në merkato. Pothuajse një shaka e fatit.
Një situatë me përmasa gati teatrale, nëse mendohet për mënyrën se si shkuan gjërat javët e fundit: fillimisht ishte futbollisti anglez ai që u transferua te Bologna dhe në orët e fundit të merkatos francezi do të bëhet pjesë e re e skuadrës së Milan.
Rabiot e Rowe ballë për ballë në Milan-Bologna pas sherrit në Marsejë
Olympique Marseille vendosi të hiqte dorë nga Adrien Rabiot dhe Jonathan Rowe pas një grindjeje të ashpër në përfundim të ndeshjes hapëse në Ligue 1, të humbur nga OM kundër Rennes. Klubi francez kishte njoftuar kështu vendimin e tij: “Olympique de Marseille njofton se Adrien Rabiot dhe Jonathan Rowe janë futur në listën e transferimeve të klubit. Ky vendim është marrë për shkak të sjelljes së papranueshme në dhomat e zhveshjes pas ndeshjes kundër Stade Rennais FC, në marrëveshje me stafin teknik dhe në përputhje me kodin e brendshëm të sjelljes së klubit. Klubi ua ka komunikuar vendimin të dy lojtarëve të hënën”.
Për të treguar në detaje se çfarë ndodhi në dhomën e zhveshjes mes Rabiot dhe Rowe, foli Roberto De Zerbi, trajner i Marsejës, në konferencën për shtyp të javës pas ngjarjes: “Në 30 vite futboll nuk jam mësuar të flas jashtë për atë që ndodh brenda dhomës së zhveshjes, por këtë herë duhet t’i vëmë gjërat në vend. Nëse në një vend pune dy të punësuar zihen duke krijuar një sherr si në një pub anglez, para drejtorit sportiv, trajnerit dhe me një shok skuadre të shtrirë pa ndjenja: çfarë duhet të bëjë klubi, apo punëdhënësi? Mund të zgjidhej pezullimi ose largimi. Me presidentin Longoria dhe drejtorin sportiv Benatia ishim në telefon të tre ditën e shtunë dhe të diel. Prisnim të hënën për të komunikuar vendimin, të prerë: të vendosnim të dy lojtarët jashtë skuadre”.
Lexo më tej: Pse Rabiot u përjashtua nga Marseille: “Episod dhune i padëgjuar, gjëra të papara”
Trajneri italian e kishte mbyllur kështu ndërhyrjen e tij për çështjen: “Është e vërtetë që nuk u thyen dhëmbë, por në gjithë këto vite që bëj futboll, një sherr të tillë nuk e kam parë kurrë. Në atë moment, për herë të parë në karrierë, nuk dija çfarë të thosha dhe çfarë të bëja: kisha Bakolan të shtrirë në tokë me mjekun që përpiqej ta reanimonte, këta që ziheshin… për çfarë? Për një ndeshje që sipas meje nuk e kemi luajtur mirë, por është fillimi dhe mund të ndodhë”.
Rowe e Rabiot përballen në Milan-Bologna më 14 shtator në San Siro
Futbollisti anglez ishte i pari që gjeti një zgjidhje, me Bolonjën që e bleu nga OM për një shumë totale prej rreth 19,5 milionë euro, plus 10% të një rishitjeje të ardhshme në favor të klubit francez. Që kur mbërriti te rossoblù, Rowe nuk ka gjetur ende hapësirë dhe kundër Comos (në javën e dytë) qëndroi në pankinë për gjithë ndeshjen.
Rabiot është dhurata që drejtuesit e Milan i kanë bërë teknikut Massimiliano Allegri, që e ka stërvitur tashmë në kohët e Juventus, në orët e fundit të merkatos për të forcuar mesfushën kuqezi. Milan dhe Olympique Marseille kanë arritur marrëveshjen për 10 milionë euro, përfshirë bonuset, dhe lojtari do të firmosë një kontratë 4-vjeçare.
