Në Lecce, në transfertën fituese të Milanit për suksesin e parë sezonal në Serie A të kuqezinjve, Max Allegri i dhuroi gjithashtu edhe nderin e fushës Cheveyo Balentien, talentit të ri 18-vjeçar që trajneri e mori fillimisht në pankinë për ta hedhur më pas në lojë në minutën e 88’ në vend të një Santi Gimenez zhgënjyes. Një sinjal i mëtejshëm i qartë i vlerësimit për lojtarin, i marrë nga sektori i të rinjve i Ado Den Haag për ta futur te Milan Futuro në Serie D.
Debutimi në Serie A i Cheveyo Balentien në Lecce-Milan
Me rezultatin e siguruar 2-0 falë golave të Loftus-Cheek dhe Pulisic, për teknikun Max Allegri pati gjithashtu kohë për t’i dhuruar një emocion të paharrueshëm për holandezin shumë të ri i cili brenda dy javësh e pa të përmbysur jetën e tij futbollistike e jo vetëm: nga të rinjtë holandezë te debutimi në Serie A me Modric dhe shokët. Vetëm 10 minuta, por një debutim i rëndësishëm për lojtarin e lindur në vitin 2006 që i dogji të gjitha etapat në kohën më të shkurtër të mundshme.
Balentien i grumbulluar me ekipin e parë nga Allegri
Një emër i panjohur për shumicën, por që nuk kaloi pa u vënë re nga trajneri i Milanit që e bashkoi për ndeshjen e dytë të kampionatit: shkak problemet e një skuadre që ende i mungojnë disa elementë që duhet të vijnë nga merkatoja – siç konfirmoi Tare në prag të ndeshjes – dhe dëmtimet e disa titullarëve, mes të cilëve Rafa Leao që mbeti në rikuperim, ose Jashari që do të qëndrojë jashtë të paktën 2 muaj për thyerjen e fibulës. Kështu, në listë doli emri i Cheveyo Mul-Balentien, një talent shumë i ri me një të ardhme më se premtuese.
Balentien, talent për Milan Futuro që i dogji etapat
Pikërisht me “të ardhmen” duhej të ngjyrosej aventura e tij te Milani meqë Balentien u ble për të shkuar të forconte skuadrën B kuqezi, pra Milan Futuro, që këtë vit merr pjesë në kampionatin e Serie D, ku përfundoi pas rënies dramatike të vitit të kaluar. Në Serie D, Balentien gjithashtu debutoi, për ta lënë menjëherë më pas grupmoshën e tij dhe për t’u futur mes “të mëdhenjve”. Një javë “praktikë” te Modric deri te debutimi në fushë. Sigurisht, do të kthehet në Serie D për të vazhduar rritjen por prania e tij ka ngjallur më shumë se një surprizë mes tifozëve dhe dashamirësve.
Kush është Balentien, sulmues fizik dhe i shpejtë: PSG e skartoi në verë
Cheveyo Balentien është i lindur në vitin 2006 dhe me profesion është sulmues. Anësor i djathtë me shumë vrap dhe fizikalitet (1.90 cm i gjatë), ka parakushtet e lojtarit që i pëlqen Allegrit i cili nuk humbi kohë: dhjetë ditë më parë u skartua nga PSG që nuk e mbylli marrëveshjen. Kështu vetëm një javë më parë hyri në Milanello ku klubi kuqezi e mori nga sektori i të rinjve i Ado Den Haag. Një klub holandez që edhe në të kaluarën ka prodhuar talente që ia dolën, edhe në Itali, si Eljero Elia (ish-Juventus) ose Jerdy Schouten (ish-Bologna).
