“Prokuroria e Posaçme po e trajton këtë çështje me mentalitetin ‘në fillim arresto, pastaj heto’,” deklarojnë avokatët e Erion Veliajt, duke akuzuar organin e akuzës për pengimin e të drejtave të tij bazike në procesin e mbrojtjes.
Sipas tyre, Veliaj ka kërkuar të marrë një kopje fizike të materialeve hetimore, por kërkesa është refuzuar me arsyetimin se dosjet i janë dorëzuar vetëm në një USB, një format i papërdorshëm në kushtet e izolimit ku ndodhet. Po ashtu, vijon të mohohet takimi me avokatët e tij ndërkombëtarë, që po përgatisin ankimimin në Gjykatën Europiane të të Drejtave të Njeriut.
Avokatët e shohin këtë si një shkelje të të drejtës kushtetuese dhe asaj të garantuar nga Konventa Europiane, ndërsa nënvizojnë se i pamundësohet qartazi përgatitja e një mbrojtjeje efektive.
Reagim i avokatëve të Erion Veliaj:
Këtë muaj, Erion Veliaj i ka kërkuar zyrtarisht Prokurorisë së Posaçme për t’i vendosur në dispozicion një kopje fizike të materialeve hetimore, që lidhen me hetimin ndaj tij. Ai e ka bërë këtë kërkesë për të patur mundësinë që të përgatisë një mbrojtje efektive, bazuar edhe në të drejtën që i garanton neni 31 i Kushtetutës së Republikës së Shqipërisë dhe neni 6 i Konventës Evropiane për të Drejtat e Njeriut.
Por, kërkesa u refuzua me argumentin se dokumentet i janë dorëzuar me anë të një USB-je avokatëve të tij. Një USB, e cila, në kushtet e izolimit ku ndodhet aktualisht z. Veliaj, në mungesë të plotë të aksesit në pajisje elektronike, është praktikisht e papërdorshme për të, dhe as ne nuk jemi në gjendje t’ia dërgojmë të gjitha aktet, për shkak të volumit të lartë të tyre.
Po ashtu, Prokuroria e Posaçme vijon të refuzojë kërkesën e ligjshme të z. Veliaj për t’u takuar me avokatët e tij ndërkombëtarë, të cilët po përgatisin çështjen për në Gjykatën Europiane të të Drejtave të Njeriut, një e drejtë e cila i garantohet nga Konventa Europiane e të Drejtave të Njeriut.
Prokuroria e Posaçme po e trajton këtë çështje me mentalitetin “në fillim arresto, pastaj heto”. Kjo është shqetësuese, duke marrë parasysh edhe numrin e lartë të të paraburgosurve në Shqipëri. Erion Veliaj nuk ka mundësi t’i aksesojë aktet, për të cilat ka nevojë për të mbrojtur veten. Gjithashtu, atij i pamundësohet të ushtrojë detyrën si kryetar i Bashkisë së Tiranës, ku është zgjedhur për 3 mandate radhazi, në mënyrë demokratike, nga qytetarët e Tiranës.
