Teksa nuk ka kaluar shumë kohë nga skandali i mikrokredive ku u mashtruan me qindra e mijëra qytetarë, në skenë ka dalë një platformë, e cila ka si synim zhvatjen e shqiptarëve.
Bëhet fjalë për platfotmën online TXEX, e cila është denoncuar edhe nga deputeti i Partisë Socialiste, Erion Braçe, si një skemë piramidale që po grabit qytetarët shqiptarë.
Braçe thotë se është informuar për këtë rast dy muaj më parë përmes një sipermarrësi dhe se të paktën në Divjakë janë 1000 qytetarë të prekur. Ndërkohë paralajmëron se po mashtrohen edhe njerëz në Lushnje.
“Dy muaj më parë një sipërmarrës më vuri në dijeni, ai nisur nga çpo dëgjonte prej njerëzve të ndryshëm në Divjakë. Jam munduar t’i them kujt kam mundur në Divjakë të dalë sa më shpejt nga kjo skemë piramidale apo të mos hyjë në të. Ia kam komunikuar policisë dhe dua shumë të besoj e kam besimin që po bën gjënë e duhur”, shkruan Braçe në profilin e tij në Facebook.
Ai apelon qytetarët që të dalin urgjentisht nga kjo platformë mashtruese dhe të bëjnë denoncim në polici.
Ndërkohë sipas denoncimeve në median online, thuhet se janë një numër i lartë qytetarësh shqiptarë që janë mashtruar nga TXEX. Konkretisht mbi 6.000 qytetarë janë prekur deri tani, me humbje që mendohet se kalojnë 5 milionë dollarë.
Por çfarë është platforma TXEX, pre e së cilës po bien qytetarët shqiptarë?
Sipas raportimeve, TXEX paraqitet si aplikacion investimi në kriptovaluta, por në fakt është një mashtrim përmes rrjeteve sociale dhe platformave si Telegram, Signal e ËhatsApp.
Skema nis me reklama joshëse në Instagram dhe TikTok, ku individë anonimë prezantohen si “ekspertë tregu” apo “mentorë financiarë” dhe krijojnë grupe të rreme investimi.
Fillimisht kërkohet të investohen shuma të vogla përmes platformave legjitime, por më pas fondet kalohen në TXEX. Aty “fitimet” rriten fiktivisht, ndërsa për tërheqje kërkohet një tarifë prej 400 dollarësh. Përveç humbjes së parave, qytetarët kanë dorëzuar edhe dokumente personale, duke rritur rrezikun e abuzimit me të dhënat.
Duhet nënvizuar se kjo skemë po godet drejtpërdrejt shqiptarët, me komunikim në shqip dhe grupe të dedikuara për tregun vendas, por institucionet shqiptare deri tani kanë mbetur të heshtura. TXEX nuk figuron në QKB, nuk ka licencë nga Banka e Shqipërisë apo AMF, dhe nuk ka asnjë adresë apo zyrë fizike në vend.
