Lapsi Video

Aplikacioni

Android iOS
Flash

Merr fund kriza në Kosovë/ Zgjidhet kreu i ri i kuvendit

Lapsi.al 26 August 2025
Merr fund kriza në Kosovë/ Zgjidhet kreu i ri i kuvendit
Pas gati shtatë muajsh nga përfundimi i zgjedhjeve parlamentare, Kuvendi i Kosovës ka zgjedhur kryeparlamentarin e ri duke i dhënë fund krizës. Ai është Dimal Basha i Lëvizjes Vetëvendosje që  ka marrë 73 vota pro për postin e kryetarit të Kuvendit, nga më pak se 60 vota që patën marrë kandidatët paraardhës të propozuar nga  Vetëvendosja. Për këtë post, Basha mori vota edhe nga Partia Demokratike e Kosovës, e cila kishte vënë si kusht se do të votonte vetëm për deputetë që s'kishin qenë më parë pjesë e qeverisë Kurti. Por në votimin e parafundit PDK nuk e votoi as Dimal Bashën duke u vënë në qendër të kritikave. Pas zgjedhjes, kryetari i Partisë Demokratike të Kosovës, Memli Krasniqi ironizoi duke u thënë  “urime” shoqërisë civile që pardje e kritikuan PDK-në pse nuk e mbajti premtimin. “Urime ju qoftë atyne që kanë marrë këtë vendim. Por, urime u qoftë edhe atyne që u kish psa mbetë merak para dy dite që thojshin pse nuk e votuat Dimalin. Qe, kënaquni, e keni Dimalin kryetar”, tha Krasniqi. Tallja e tij ka një motiv të qartë sepse Basha ka qenë shpesh objekt humori për opozitën. Ai është konsideruar si një deputet arketip i Vetëvendosjes, partizan i paepur e skajshmërisht polarizues, i njohur për shpërthime të ashpra irracionale ndaj të gjithëve. Ndërsa Lumir Abdixhiku, kryetar i Lidhjes Demokratike të Kosovës, partia e të cilit votoi kundër Bashës, e ka konsoderuar këtë votim si një fitore të injorancës. “Kosova, siç se kishim menduar asnjëherë. Një fitore e injorancës dhe një gabim i pafalshëm i mbështetësve të saj. Gjithsesi ky është niveli i tyre. Kështu e projektojnë Republikën. Me këto vlera kanë zgjedhur të nderojnë dhe votuesit e popullin e Kosovës. LDK aspiron më lartë. Kosova duhet të aspirojë lartë. Aksidentet politike e triumfet e injorancës historike do të kapërcejnë. Dritë një ditë do të ketë”, ka shkruar ai në Facebook; Kryetari i sapozgjedhur i Kuvendit, Dimal Basha, ka thënë se ndjen përgjegjësinë e madhe që i është besuar. “Ka disa muaj që ky Kuvend është ballafaquar me një sfidë që nuk e ka parë më herët. Por mos harroni, që me gjithë betejat, besoj që ka qenë shkollë që i ka shërbyer demokracisë dhe emancipimit të shoqërisë”, ka thënë ai. Ai ka bërë thirrje për bashkëpunim dhe unifikim. “Shumica prej nesh dallojmë me parti por qytetarët presin që të jemi të bashkuar në objektivat tona, si zhvillimi ekonomik, forcimi i së drejtës e mbi të gjitha mbrojtja e integritetit territorial”, ka thënë ai. Fundi i krizës 9-mujore erdhi pas 59 votimesh të dështuara për të zgjedhur kreun e kuvendit duke nisur nga Albulena Haxhiu, Donika Gërvalla, Hekuran Murati e Arbërie Nagavci. Asnjëri prej tyre nuk arriti të marrë më shumë se 57 vota, nga 61 të domosdoshme. Nuk dihet nëse partia e Albin Kurtit do të mundet ta arrijë këtë shifër edhe për te formuar qeverinë e re. Kush është Dimal Basha, kryetar i ri i Kuvendit? Dimal Basha ka lindur më 12 tetor 1979 në Prishtinë dhe jeton në qytetin e Ferizajt. Studimet e larta i ka përfunduar në “John Jay College of Criminal Justice” në New York, duke diplomuar me vlerësimin më të lartë në drejtimin “E Drejta Penale Ndërkombëtare.” Dimali gjithashtu ka përfunduar studimet Master në Marrëdhënie Ndërkombëtare, me fokus në “Konflikt dhe Siguri,” në Universitetin “The New School University,” po ashtu në New York. Me një përvojë të pasur profesionale, Dimali ka punuar në zyrën e ish-Kongresmenit Eliot Engel, si dhe si Analist i të Dhënave Kualitative në Gjykatën Federale të ShBA-së. Përveç kësaj, ai ka ushtruar një karrierë të suksesshme menaxheriale në Angli dhe ShBA. Në politikë, Dimal Basha ka shërbyer si deputet i Kuvendit të Republikës së Kosovës për dy mandate, duke përfaqësuar Lëvizjen Vetëvendosje! Ai ka qenë anëtar në Komisionin për Punë të Jashtme, Komisionin për Legjislacion, Komisionin për Mbikëqyrjen e AKI-së dhe Komisionin për Stabilizim-Asociim.

©Lapsi.al

Të këshilluara

Parashikimi i motit për këtë të martë

Ditën e martë vendi ynë do të ndikohet nga kushte atmosferike të qëndrueshme. Moti parashikohet të jetë fillimisht me vranësira mesatare deri të dendura. Gradua...

07:15

ide

Si të shndërrohet protesta në lëvizje

Mungesa në shoqërinë shqiptare e një lëvizje shpërndërruese për sistemin politik dhe kulturor të këtyre 35 vjetëve, neoliberal neokolonialisht: ky është problemi më i madh që kemi

10:06 Rudian Zekthi

Një antihero i dëshpëruar i Homerit

Kryeministri ka përdorur mitin antik të Odiseut që nuk joshet nga sirenat, për të përçuar mesazhin se ai do të vazhdojë përpara pa pyetur për protestuesit. Por nëse nuk do e kish njohur veprën e Homerit vetëm përmes ekranizimit, do të kish gjetur tek kjo metaforë gjurmët e një autokrati

16:50 Andi Bushati

MOTI TIRANA

31°c

KËMBIMI EURO

94.30

aktuale

Ndiqe Lapsin edhe në

Me interes nga publiku

Me sytë katër

SPORT

Të tjerë artikuj

PAPARAZZI