Fjalori i Teknologjisë së Informacionit, anglisht-shqip, pritet të vijë së shpejti, me mbështetjen e Fondacionit Mane. Fjalori është produkt final i një hulumtimi disa vjeçar të pedagogut Erion Çano dhe përkthyesit Edmond Tupja. Botimi konsiderohet një studim i thelluar, me 6 mijë fjalë, dhe jo vetëm me përkthim terminologjik anglisht-shqip, por edhe shqip-anglisht.
Detajet janë ndarë në një takim të mbajtur mes bashkëautorëve dhe themeluesit të Fondacionit Mane, Samir Mane.
Samir Mane bëri të ditur se Fondacioni Mane do të dhurojë kopje botimi për institucionet arsimore si Tirana Business University dhe Universiteti Politeknik i Tiranës, ndërsa vlerësoi se fjalori i IT do të jetë një mjet komunikimi mjaft i rëndësishëm arsimor dhe profesional, që mbi të gjitha do të ndihmojë në ruajtjen e gjuhës shqipe.
Ai shtoi se fjalori do të jetë gjithashtu pjesë e bibliotekës së Departamentit IT në Grupin BALFIN, si një dritare e shtuar njohurish për të gjithë ekipin e specialistëve në fushën e Teknologjisë së Informacionit.
“Fjalori i Teknologjisë së Informacionit është një ndihmë e madhe për të ruajtur gjuhën në një hapësirë si teknologjia, që lëviz shumë shpejt. Ky fjalor do të shërbejë për të ruajtur gjuhën, por pa frenuar ndryshimet teknologjike. Është një kontribut me vlerë jo vetëm për studiuesit, apo për zbatuesit e teknologjisë, por për të gjithë, pasi të gjithë jemi përdorues të rregullt të mjeteve digjitale dhe teknologjike”, tha Samir Mane.
Erion Çano, i specializuar për gjuhësi kompjuterike, e vlerësoi botimin si rezultatin e një pune të gjatë kërkimore, ndërsa shtoi se “përfshirja e plot 6 mijë fjalëve dhe dykahësia e përkthimit e bëjnë fjalorin një mjet unik dhe shumë të dobishëm për studentët dhe profesionistët.”
Edmond Tupja u shpreh se e gjitha është një përpjekje e përbashkët për të shmangur barbarizmat gjuhësore. “Gjuha shqipe nuk është aspak një gjuhë e varfër, përkundrazi. Përdorimi i termave të përshtatshëm, është një domosdoshmëri për të të ruajtur pasurinë e gjuhës sonë.”
Edukimi është një prej shtyllave kryesore të aktivitetit të Fondacionit Mane. Prej themelimit në vitin 2023, fondacioni ka mbështetur një sërë projektesh dhe ka ndërmarrë një sërë nismash për të përmirësuar sistemin arsimor, kurrikulat dhe infrastrukturën. Përmendim këtu ngritjen e laboratorëve modernë nëpër universitete të ndryshme të vendit, rinovimin dhe modernizimin e hapësirave të kopshteve dhe shkollave 9-vjeçare, aktivizimin e profesionistëve të Grupit BALFIN për të shkëmbyer përvojën e tyre nëpër fakultete, etj.
Fondacioni Mane e qendërzon aktivitetin e tij në nisma që arrijnë të sjellin vërtet ndryshime pozitive në shoqëri dhe botimi i Fjalorit të Teknologjisë Informacionit, shihet si një iniciativë që do t’i përgatisë siç duhet studentët e profilizuar për tregun e punës; do të thellojë njohuritë e profesionistëve duke u ofruar një burim të besuar në fushën teknologjike, por mbi të gjitha do t’i afrojë edhe me shumë me gjuhën shqipe.
Fjalori i Teknologjisë së Informacionit pritet të dalë në nëntor të 2025-s.
