Pas tensioneve mes presidentit amerikan Donald Trump dhe presidentit ukrainas Volodymyr Zelensky në muajin shkurt, zëvendëspresidenti JD Vance ka tentuar të lidhet me Valerii Zaluzhnyin, ish-komandantin e Ushtrisë ukrainase dhe ambasadorin aktual ukrainas në Londër.
Sipas raportimeve të The Guardian, qëllimi i kësaj përpjekjeje ishte testimi i Zaluzhnit si një alternativë e mundshme politike ndaj Zelenskyt, në një moment kur marrëdhëniet mes dy udhëheqësve ishin të tensionuara.
Megjithatë, Zaluzhnyi – i konsideruar nga shumëkush si një president i ardhshëm i mundshëm i Ukrainës – refuzoi të pranonte telefonatën, pasi u konsultua me ekipin e Zelenskyt.
Vendimi i tij u interpretua si një shenjë besnikërie ndaj presidentit aktual, pavarësisht se në arenën ndërkombëtare ai shihet si një figurë e fortë politike dhe ushtarake me ndikim të madh.
Ky episod erdhi në një kohë kur marrëdhëniet mes Kievit dhe Washingtonit ishin më të brishta se kurrë, me Trump-in që shpesh ka vënë në dyshim mbështetjen amerikane për Ukrainën dhe ka paralajmëruar se mund të ndryshojë qasjen ndaj luftës nëse nuk arrihet një zgjidhje e shpejtë me Rusinë.
Megjithatë, javët e fundit është vënë re një afrim i Trump me Zelenskyn, duke parë edhe takimin e mirë që dy liderët patën në Shtëpinë e Bardhë, për të shtyrë bisedimet me Rusinë.
Nuk kuptohet megjithatë nëse Vance ende po kërkon të “rrëzojë” Zelenskyn. Por, ajo çfarë dihet, është se edhe rivalët më të ashpër të presidentit ukrainas brenda vendit, nuk e kanë vënë asnjëherë në dyshim legjitimitetin e tij.
Përkundrazi, janë shprehur solidarë, duke parë se Ukraina është ende në gjendje lufte dhe mbajtja e zgjeshjeve është a pamundur aktualisht.
