Kryeministri kanadez Mark Carney deklaroi të hënën në Kiev se nuk e përjashton mundësinë e pranisë së trupave kanadeze në Ukrainë, si pjesë e garancive të sigurisë që po hartohen aktualisht mes Ukrainës dhe aleatëve të saj.
Deklarata u bë gjatë një konference të përbashkët për shtyp me presidentin ukrainas Volodymyr Zelensky.
Nga ana e tij, Zelensky theksoi se prania e ushtarëve të huaj në territorin ukrainas pas përfundimit të luftës me Rusinë do të kishte rëndësi të madhe për vendin.
“Çështja e pranisë, siç thuhet, e ‘këpucëve në terren’ është e rëndësishme për ne”, tha presidenti ukrainas, duke folur krah kryeministrit kanadez, i cili ndodhet në Kiev me rastin e përvjetorit të pavarësisë së Ukrainës nga Bashkimi Sovjetik, më 1991.
