Që nga e marta, dhe deri të shtunën, përleshjet midis mbështetësve të qeverisë dhe protestuesve janë shumëfishuar në disa qytete serbe, të transformuara në fusha beteje gjatë natës, me burra të maskuar, origjina e të cilëve është e vështirë të përcaktohet, që vandalizojnë zyrat e partisë progresiste në pushtet. Policia ka rritur numrin e arrestimeve të dhunshme, videot e të cilave janë postuar në mediat sociale, me qëllimin e qartë për të frikësuar opinionin publik, ndërsa qeveria akuzon kundërshtarët se duan të "shkatërrojnë Serbinë" dhe ta zhytin vendin në "luftë civile ". Kjo strategji të kujton ndërhyrjen e titushkëve në Kiev gjatë revolucionit të Maidanit në vitet 2013-2014, kur partia e atëhershme në pushtet përdori grupe huliganësh dhe oficerë policie me rroba civile për të mbjellë dhunë në tubimet paqësore.
Pasiviteti i kryeqyteteve evropiane Duke nxitur vetë kaosin që denoncon, zoti Vuçiç shpreson qartë se kjo dhunë do të diskreditojë studentët serbë, veçanërisht në sytë e Bashkimit Evropian (BE) dhe udhëheqësve të tij. Për të mobilizuar rrymën e fortë pro-ruse që përshkon vendin e tij, ai akuzon rregullisht, pa dhënë prova, "shërbimet e huaja" për "organizimin e një revolucioni me ngjyra". Por presidenti serb, në realitet, gjithmonë është mbështetur, deri më tani, në pasivitetin e Brukselit dhe kryeqyteteve evropiane, që hezitojnë të kritikojë metodat e tij. Presidenti Emmanuel Macron, i cili i shiti 12 avionë luftarakë Rafale Serbisë në vitin 2024, duke përshëndetur "ndryshimin strategjik" në vend, i cili deri më tani është armatosur kryesisht nga Rusia, është treguar i përmbajtur për të artikuluar çdo kritikë. Gjermania, e cila po mbështetet te z. Vuçiç për të hapur një minierë litiumi në Serbi, thelbësore për industrinë e saj automobilistike, por shumë e diskutueshme në nivel lokal, është po aq diskrete. Në Bruksel, Komisioni Evropian nuk ka shfaqur shenja agresiviteti. Protestat në Serbi, digjen sërish zyrat e partisë së Vuçiçit Lëvizja protestuese nuk është gjithashtu pa paqartësi, me shumë slogane nacionaliste dhe pro-ruse midis protestave. Kjo nuk duhet ta pengojë BE-në të përballet me të dukshmen: vazhdimi i negociatave të pranimit me Serbinë nën udhëheqjen e Aleksandar Vuçiç është bërë i pakuptimtë. Kjo vetëm sa përforcon bindjen e opozitarëve serbë, të cilët besojnë se Evropa mbështet autokratin e tyre. Marre nga e perditshmja Le Monde që mban datën 19 gusht
