Pas samitit të së premtes në Alaskë mes presidentit amerikan Donald Trump dhe atij rus, Vladimir Putin, bisedimet për Ukrainën zhvendosen në Shtëpinë e Bardhë.
Presidenti Volodymyr Zelensky ka mbërritur në Uashington për takimin me Trump, dhe do të zhvillojë një takim dy palësh në orën 13:15 me orën lokale (19:15 sipas orës shqiptare) dhe më pas do të përshëndesë udhëheqësit evropianë në orën 20:15.
Një foto në grup është planifikuar një çerek ore më vonë, dhe takimi i përbashkët është planifikuar për në orën 21:00.
Udhëheqësit evropianë pritet të mbërrijnë në Shtëpinë e Bardhë në orën 18:00. Liderët evropianë që do të marrin pjesë janë Emmanuel Macron, Keir Starmer, Giorgia Meloni, Ursula von der Leyen, Friedrich Merz, Alexander Stubb dhe Sekretari i Përgjithshëm i NATO-s, Mark Rutte. Në Uashington ka mbërritur dhe Meloni.
Një ditë më parë, udhëheqësit evropianë, nëpërmjet një takimi virtual të “koalicionit të vullnetshmëve”, konfirmuan mbështetjen e tyre të plotë për Ukrainën. Ata riafirmuan unitetin përballë agresionit rus dhe theksuan se, në mungesë të një armëpushimi, SHBA-ja dhe Bashkimi Evropian duhet të rrisin presionin ndaj Moskës.
