Duke qenë në disavantazh prej dy golash deri në minutën e 85-të të Superkupës kundër Totenhemit, të mërkurën në Udine (Itali), PSG-ja arriti në fund të fitojë trofeun pas goditjeve nga pika e penalltisë (2-2, 4-3 me penallti), pas një rikthimi spektakolar. Kang-In Lee (85’) dhe Gonçalo Ramos (90’+5) i dhanë ekipit të tyre një barazim të papritur, përpara se të bënin diferencën në një seri penalltish të shënuar veçanërisht nga një pritje e Lucas Chevalier ndaj goditjes së Micky Van de Ven, në ndeshjen e tij të parë që nga ardhja këtë fundjavë.
“Nuk e di çfarë mund të pres”, pati thënë Luis Enrique të martën, në prag të Superkupës së Europës kundër Tottenham-it. Dhe me të drejtë, pasi lojtarët e tij u kthyen në stërvitje vetëm të mërkurën e kaluar, pas tre javë e gjysmë pushimesh. “Ky nuk është një justifikim, do të përpiqemi të fitojmë”, shtoi trajneri spanjoll 55-vjeçar. Dhe pikërisht këtë bënë parizienët (2-2, 4-3 me penallti) të mërkurën, në Udine. Duke qenë në disavantazh 0-2 deri në minutën e 85-të, të konsideruar tashmë të humbur, ata gjetën forcën për të barazuar dhe për të çuar ndeshjen në serinë e penalltive. Si kampion i Europës, PSG-ja bëhet kështu klubi i parë francez që fiton Superkupën e Europës. ©Lapsi.al
