Pas ndërprerjes së transmetit dhe rrethimit të godinës nga policia, raportohet se një urdhër i papritur ka mobilizuar Inspektoriatin Kombëtar të Mbrojtjes së Territorit.
Sipas raportimeve të Panoramës, IKMT ka marrë urdhër që të prishë urën lidhëse mes godinës së News24 dhe redaksisë së Panorama TV e cila ka kontratë të rregullt deri ne vitin 2033. Kjo urë lidhëse bashkon dy godinat dhe njoftohet se është pika më e rëndësishme, pasi lidh transmetimin e Neës24 dhe serverat dhe prishja e saj do të sillte dëme të mëdha për televizionin, jo vetem per sinjalin e tij por edhe financiare.
News24 i ka bërë thirrje IKMT të mos vijojë me zbatimin e urdhrit, pasi prishja e tunelit do dëmtonte kabllot që ndodhen në këtë strukturë dhe do të dëmtonte pajisjet, serverat, arkivën dhe transmetimin e News24.
Transmetimi i kanalit informativ News 24 është ndërprerë që nga ora 07:36 e 9 gushtit, duke shfaqur vetëm shiritat vertikalë me ngjyra që tregojnë mungesën e sinjalit. Grupi mediatik me rreth 250 punonjës, ku përfshihen redaksitë e News 24, BalkanWeb, Panorama dhe Gazeta Shqiptare, e cilësoi veprimin si një goditje ndaj lirisë së shprehjes. Sipas drejtuesve, autoritetet kanë kërkuar që godina t'i kalojë kompanisë shtetërore "KAYO”, e specializuar në prodhimin dhe tregtimin e armëve.
