Policia e Lushnjës ka vënë në pranga një 40-vjeçar të shpallur në kërkim, i cili akuzohet për tentativë për kryerje të marrëdhënieve seksuale me dhunë ndaj një gruaje në qytet.
Sipas njoftimit zyrtar, është arrestuar shtetasi Roberto Cerria, 40 vjeç, i cili dyshohet se më datë 6 korrik 2025 ka tentuar të kryejë marrëdhënie seksuale me dhunë me një 35-vjeçare, në banesën e kësaj të fundit.
Ngjarja, që ndodhi në kushte shqetësuese për sigurinë e viktimës, ka alarmuar autoritetet vendore, të cilat nisën hetimet dhe kontrollet për kapjen e të dyshuarit.
Ai ishte shpallur në kërkim për veprën penale “Marrëdhënie seksuale me dhunë me të rritura”, mbetur në tentativë dhe u arrestua pas një pune të mirëorganizuar nga strukturat policore. Materialet procedurale i kanë kaluar tashmë Prokurorisë pranë Gjykatës së Shkallës së Parë të Juridiksionit të Përgjithshëm Lushnjë, për veprime të mëtejshme.
