Nga “Special One” në “Boring One”, hapi është më i shkurtër nga sa pritej. Mund të thuash gjithçka, por jo që José Mourinho është një njeri i mërzitshëm. Gjithmonë i gatshëm për të bërë polemika, batuta, provokime, Special One është prej pothuajse dy dekadash një nga personazhet më mediatikë të botës së futbollit. E megjithatë, ka nga ata që shkojnë kundër rrymës dhe jo një person çfarëdo, por pikërisht presidenti i tij te Fenerbahçe: “Mourinho është njeriu më i mërzitshëm në botë, flet vetëm për futboll, gjithë kohën”, ishin fjalët e Ali Koç.
Lexo më tej: Skandal në Turqi! Mesazhe kundër Mourinho dorëhiqen drejtuesit: “Ta bëjmë ta paguajë”
Deklarata befasuese vjen pas zërave që qarkullonin në Turqi dhe që flisnin për festa me alkool mes Mou dhe Ali Koç. Kështu, numri 1 i klubit të Stambollit i hodhi poshtë thashethemet që qarkullojnë nepër mediat turke: “Çfarë festash, Mourinho as nuk pi, flet gjithmonë dhe vetëm për futboll, për kundërshtarët, për ndeshjet… është i mërzitshëm”. Është e mundur që Ali Koç ta ketë ekzagjeruar për t’u mbrojtur nga akuzat, por e sigurt është që Jose Mourinho, të paktën në javët e ardhshme, nuk do të marrë shumë ftesa për festa në Bosfor…
