Julio Sergio ka përjetuar dramën e vdekjes së djalit të tij Enzo, i cili ndërroi jetë në moshën 15-vjeçare për shkak të një tumori në tru të diagnostikuar në vitin 2020. Ish-portieri i Romës e kishte njoftuar të gjithëve lajmin e trishtë përmes një postimi të publikuar në profilin e tij në Instagram vetëm dy ditë më parë. Enzo, i cili ashtu si babai i tij e donte shumë futbollin, është përkujtuar dhe nderuar nga shumë ish-kolegë të brazilianit dhe futbollistë të cilët kanë treguar afërsinë e tyre me familjen. Ndër ta nuk munguan lojtarët e Romës dhe vetë klubi verdhekuq që nga fusha stërvitore në Trigoria shfaqi një banderolë gjigante për të kujtuar Enzon me mbishkrimin: “Julio, jemi të gjithë me ty”.
Ajo mbahej në duar pikërisht nga lojtarët e skuadrës verdhekuqe të drejtuar nga Gasperini. Julio Sergio ka një lidhje të fortë dhe të ngushtë me Romën për shkak të së kaluarës së tij si portier i skuadrës kryeqytetase nga viti 2006 deri më 2011 dhe më pas në sezonin 2012/2013. Një gjest, ai i verdhekuqve, që e preku thellësisht Julio Sergion, i cili sërish nga llogaria e tij në Instagram u përgjigj i prekur, duke mbetur plotësisht pa fjalë përballë gjithçkaje.
Ky është postimi i ish-portierit verdhekuq
“Për herë të parë në jetën time, nuk di ç’të them… Enzo ka lindur në Romë dhe është romak dhe tifoz i Romës. Ky klub dhe ky qytet kanë qenë pjesë e momenteve më të lumtura të jetës sonë. Dhe sot, në momentet më të trishta dhe të vështira, janë më të pranishëm se kurrë. Nuk mund të bëj gjë tjetër veçse t’ju falënderoj për çdo mesazh, çdo gjest, çdo lutje bërë për Enzon dhe familjen tonë.
Nuk mund të bëj gjë tjetër veçse t’ju falënderoj dhe t’ju them se kjo na ngushëllon jashtë mase, dhe e ndjejmë gjithë këtë dashuri dhe empati sikur të ishim fizikisht bashkë, sepse në shpirtin dhe në zemrat tona, do të jemi bashkë përjetë. Ashtu siç edhe Enzo do të jetë gjithmonë me ne, në zemrat dhe kujtimet tona. Gjithmonë bashkë! Faleminderit Romë”.
Gjesti i bukur i Julio Sergio
Para vdekjes së djalit të tij, Julio Sergio i dha mundësinë Enzos të njihte Neymar dhe më pas të dy u bënë protagonistë të një gjesti të mrekullueshëm kur, përmes një videoje, u shfaqën së bashku te berberi teksa rruanin flokët. Një filmim që preku zemrat e të gjithë botës vetëm pak javë më parë, përpara se të vinte lajmi i trishtë i vdekjes së Enzos.
