Kryeministri Britanik Keir Starmer tha se Mbretëria e Bashkuar do të njohë një shtet palestinez në muajin shtator, nëse Izraeli nuk ndërmerr masa konkrete për të përfunduar situatën e tmerrshme në Gaza.
Starmer ka deklaruar se Izraeli duhet të ndërmarrë hapa thelbësorë për t’i dhënë fund situatës së tmerrshme në Gaza, të arrijë një armëpushim, të bëjë të qartë se nuk do të ketë aneksim të Bregut Perëndimor dhe të angazhohet për një proces paqeje afatgjatë që ofron një zgjidhje me dy shtete.
“Gjithmonë kam thënë se do të njohim një shtet palestinez si një kontribut për një proces të drejtë paqeje në momentin me ndikim maksimal për zgjidhjen me dy shtete,” tha kryeministri britanik në një konferencë për shtyp pas një mbledhjeje të kabinetit.
Starmer organizoi këtë mbledhje një ditë pasi deklaroi se publiku britanik ishte “i zemëruar” me imazhet e njerëzve që po vdisnin nga uria në Gaza, duke folur së bashku me presidentin amerikan, Donald Trump në Skoci.
Kryeministri britanik po përballet me presion në rritje brenda Partisë së tij Laburiste për të mbajtur një qëndrim më të ashpër ndaj Izraelit, që u theksua edhe më shumë pas njoftimit të fundit të presidentit francez, Emmanuel Macron, i cili njoftoi se Franca do të njohë një shtet palestinez në shtator.
https://youtu.be/5NxQE5L5v38
