Lookman te Inter, ofertë e re për Atalantën: çfarë mungon ende pas takimit të fundit

Marotta dhe Percassi u takuan sot për të marrë pjesë në këshillin e Ligës, një rast për të folur për merkaton dhe për të bërë një bilanc mbi tratativën që duhet ta çojë Ademola Lookman nga Atalanta te skuadra e drejtuar nga Chivu. Një operacion jo i lehtë, me ofertën e fundit prej 40 milionë eurosh plus 5 milionë bonuse. Një çështje që po zhvillohet thuajse me faza, për të cilën të dy klubet po punojnë prej disa javësh. Në pritje për të marrë “po”-në e Atalantës, Inter tashmë ka arritur marrëveshjen me sulmuesin nigerian për kontratën. Lookman, në fakt, do të përfitonte rreth 4 milionë euro në vit.

Mungon akordi me Atalantën

Por pengesa mbetet pikërisht marrëveshja me Atalantën. Takimi i sotëm ishte i rëndësishëm veçanërisht për Inter, që ka përsëritur dëshirën e vet për të ofruar një shumë të rëndësishme për kartonin e lojtarit, por pa dashur të shkojë përtej kësaj. Atalanta për momentin dëgjon, pa vendosur një çmim të saktë për marrëveshjen. Aktualisht nuk ka një marrëveshje mes dy klubeve, por është e qartë se bergamaskët duan të përfitojnë diçka më shumë. Inter, ndërkohë, ka gati planin B, një alternativë: Nico Gonzalez nga Juventus.

Lexo më tej: “Nuk më respektoi”: Lookman përplaset me Gasperinin, pasi humbi penalltinë

Fillimisht, Atalanta, përballë ofertës së parë prej 40 milionësh nga Inter, kishte reaguar në mënyrë të veçantë duke kërkuar kartonin e Pio Esposito. Inter e refuzoi menjëherë këtë kërkesë, duke e cilësuar sulmuesin e ri të pashitshëm. Dhe kështu nisi faza e dytë e operacionit, ku Inter mori përsipër të vendosë çmimin, duke shpresuar që shuma të kënaqë Atalantën. Për Lookman është shprehur publikisht dhe personalisht në “Live Gala Dinner”, drejtori sportiv i Inter, Piero Ausilio: “Na pëlqen shumë dhe do të donim ta sillnim në Milano, por duhet të gjejmë marrëveshjen me Atalantën”.

??????? ???????, true baller ?? #AtalantaEmpoli pic.twitter.com/fMYDKvQF0O

— Lega Serie A (@SerieA_EN) April 30, 2024

Nico Gonzalez është alternativa e parë ndaj Lookman

Alternativa është Nico Gonzalez, i cili pritet të largohet nga Juventus. Argjentinasi mund të kalojë te zikaltërit për një shumë prej 20 milionë eurosh plus bonuse. Ditët e fundit kanë ndodhur tashmë kontakte me përfaqësuesit e sulmuesit në përpjekje për ta bllokuar. Por prioriteti mbetet Lookman. Qëllimi i Atalantës është të përfitojë sa më shumë për të zbritur pastaj në merkato dhe për të investuar ato para, së bashku me ato që do të vijnë nga shitja e Retegui, për të kompletuar repartin ofensiv që do t’i dorëzohet Juric. Palët do të rifreskojnë kontaktet në orët në vijim për të kuptuar nëse do të ketë një rritje të ofertës nga familja Percassi apo një “ok” për Interin.