Elliot Charles, djali i Matthias Verreth, disa ditë më parë ishte shtruar në spital për shkak të një virusi. Ky infeksion rezultoi fatal për vogëlushin një vjeç e dy muajsh, i cili ndërroi jetë dje për shkak të përkeqësimit të menjëhershëm të gjendjes shëndetësore. Lajmi ishte i tmerrshëm, dhe futbollisti e mori vesh në kohën e drekës, teksa ndodhej bashkë me pjesën tjetër të skuadrës. Bari, klubi ku futbollisti belg kishte mbërritur me parametër zero nga Brescia (klub që u përjashtua disa javë më parë nga futbolli profesionist), tregoi ndjeshmëri dhe respekt të madh ndaj dhimbjes së lojtarit të vet, duke marrë një vendim të rëndësishëm.
Ndonëse kishin mbetur edhe pak ditë për përgatitjet para-sezonale, klubi vendosi si shenjë zie të mbyllë më herët grumbullimin dhe të anulojë miqësoren me Cavesen (e parashikuar për nesër, të martën më 29 korrik). Klubi puglian u angazhua gjithashtu për të ndihmuar lojtarin të organizojë sa më shpejt udhëtimin e kthimit në atdhe: presidenti, Luigi De Laurentiis, bëri të mundur që Verreth të shoqërohej menjëherë me makinë drejt aeroportit të Fiumicinos, në mënyrë që të hipte në fluturimin e parë të mundshëm për t’u kthyer në Belgjikë dhe të qëndronte pranë familjes.
Gruaja e Verreth në Belgjikë me vajzën tjetër, Amelia Madelyn
Të imagjinosh telefonatën mes Verreth dhe bashkëshortes së tij, Se’li Muyabo, e cila i komunikoi tragjedinë, është diçka e tmerrshme, që të ngrin gjakun dhe të shkakton një shtrëngim të fortë në zemër. Nuk ka fjalë për të përshkruar dhimbjen, as përgjigje që mund të japin kuptim pyetjes së vetme që buron nga thellësia e shpirtit: pse pikërisht një shpirt i pafajshëm, që sapo kishte ardhur në jetë? Çifti ka edhe një vajzë tjetër (Amelia Madelyn, tre vjeç e gjysmë), siç shihet edhe nga një postim i ndarë në Instagram, ku vajza është përkulur mbi vëllain e saj të vogël dhe i jep një puthje. Një imazh i mrekullueshëm dhe njëkohësisht dramatik.
Një javë më parë kishte entuziazëm për kalimin te Bari
Matthias Verreth, 27 vjeç, është një mesfushor që ka nisur karrierën në ekipin e të rinjve të Lierse, për t’u transferuar më pas te PSV Eindhoven, ku ka kaluar të gjitha shkallët, nga akademia deri te përfaqësuesja U21. Më pas kaloi te Waasland-Beveren. Eksperienca në Kolding (Danimarkë) i hapi rrugën drejt Eindhovenit dhe më pas drejt Willem II, klub të cilin e la vitin e kaluar për të pranuar ofertën e Brescës në Serie B.
Vetëm një javë më parë, Verreth kishte ndarë në rrjetet sociale entuziazmin për fillimin e aventurës së re me fanellën e skuadrës pugliane, pas pasigurisë dhe zhgënjimit për situatën te “rondinellët” lombardë: “I lumtur që firmosa për këtë klub të mrekullueshëm. Nuk shoh dot kohën t’ju takoj të gjithëve. Le të nisim punën!” Të kap një drithërimë vetëm kur e mendon.
