Japonia dhe Shtetet e Bashkuara kanë arritur një marrëveshje të re tregtare që përfaqëson një ulje të ndjeshme të tarifave amerikane ndaj eksporteve japoneze. Marrëveshja e konfirmuar nga të dyja palët, parashikon një normë tarife prej 15%, shumë më e ulët se 25% që kërcënonte të vendosej nga presidenti amerikan Donald Trump.
Në një letër dërguar Tokios më herët këtë muaj, Trump paralajmëroi se nëse nuk do të kishte një marrëveshje deri më 1 gusht, Japonia do të përballej me një tarifë prej 25% për eksportet e saj drejt SHBA-së – një përqindje më e lartë se ajo e shpallur më 2 prill gjatë të ashtuquajturës “Dita e Çlirimit”, kur u njoftua një plan i gjerë tarifash globale.
Ky plan tarifor u pezullua për 90 ditë për shkak të reagimeve të ashpra nga tregjet botërore, duke i dhënë kohë delegacionit japonez të negocionte me përfaqësuesit amerikanë në Uashington.
Në një postim në rrjetin social Truth Social, presidenti Trump deklaroi se Japonia do të investojë 550 miliardë dollarë në SHBA, duke krijuar qindra mijëra vende pune. Ai tha gjithashtu se Japonia do t’i paguajë SHBA-së tarifa reciproke në nivelin 15%, si pjesë e marrëveshjes së re.
Kryeministri japonez Shigeru Ishiba e konfirmoi marrëveshjen të mërkurën dhe e përshëndeti si një sukses diplomatik. “Norma e tarifave të Japonisë, e cila ishte vendosur të rritej në 25%, u mbajt në 15%. Kjo është tarifa më e ulët që ndonjë vend me suficit tregtar me SHBA-në ka arritur ndonjëherë,” deklaroi ai.
Ishiba shtoi se taksat për importet e automjeteve japoneze në SHBA do të bien gjithashtu nga 25% në 15%. Megjithatë, ai theksoi se marrëveshja nuk përfshin asnjë ulje të tarifave nga ana e Japonisë, përfshirë për produktet bujqësore amerikane.
“Kjo është rezultat i përpjekjeve të mia të vazhdueshme dhe lobimit të fortë ndaj Shteteve të Bashkuara, që kur i propozova presidentit Trump idenë ‘investime në vend të tarifave’ gjatë samitit tonë në Shtëpinë e Bardhë në shkurt,” tha kryeministri.
Sipas të dhënave të Administratës Ndërkombëtare të Tregtisë, Japonia ishte tregu i katërt më i madh për eksportet bujqësore amerikane në vitin 2022, me një vlerë prej rreth 17 miliardë dollarësh. Po atë vit, SHBA ishin furnizuesi kryesor i Japonisë për ushqime dhe produkte bujqësore, të ndjekur nga Bashkimi Evropian, Kina, Australia dhe Tajlanda.
Japonia mbetet gjithashtu tregu më i madh për eksportet amerikane të mishit të viçit dhe derrit, si dhe një nga blerësit kryesorë të misrit amerikan.
