Mateo Joseph ka refuzuar të marrë pjesë në turin parasezonal të Leeds United sepse do të dëshironte të vishte fanellën e Real Betis, që po përpiqet ta rikthejë në Spanjë. Trajneri i klubit anglez, Daniel Farke, e ka shprehur kështu këndvështrimin e tij për rastin që ka shpërthyer në dhomën e zhveshjes: “Na tha se, për shkak të kësaj situate, nuk ndihet gati të udhëtojë, të stërvitet dhe të luajë miqësore në Gjermani. Çfarë mund të bëj? Nuk mund të thërras policinë për ta detyruar të stërvitet.”
Mateo Joseph është 21 vjeç, sezonin e kaluar ka shënuar tre gola dhe ka dhënë katër asist në 1.450 minuta të luajtura me Leeds mes Championship dhe FA Cup (41 ndeshje gjithsej): ka një kontratë deri në vitin 2028 me klubin anglez, i cili kërkon më shumë se dhjetë milionë euro për transferimin e tij.
Farke: “Nuk mund të thërras policinë për ta detyruar të stërvitet”
Daniel Farke foli kështu për situatën e Mateo Joseph: “Dua të jem i sinqertë: plani ishte që ai të vinte në Gjermani, dhe situata është mjaft e qartë. Gjëja e parë është që e vlerësojmë shumë. Përndryshe nuk do ta kishim aktivizuar, veçanërisht në fillim të sezonit të kaluar, përpara golashënuesit më të mirë Joël Piroe ose një sulmuesi me përvojë si Patrick Bamford.”
“Tani ai erdhi tek ne dhe na tha se do një sfidë të re dhe se do të dëshironte të ndryshonte ambient. Gjithashtu la të kuptohet se preferon të shkojë në Spanjë për shkak të rrënjëve të tij. Besoj se ishte më shumë a më pak një vendim i tij,” shtoi trajneri i Leeds.
Lexo më tej: Video/ “Trashaluq bastard”, McKennie fyhet nga tifozët e Leeds: i ati i del në mbrojtje me videon e gorillës Harambe
Së fundi, Daniel Farke nuk i kurseu fjalët për situatën: “Na tha se, për shkak të kësaj situate, nuk ndihet gati të udhëtojë, të stërvitet dhe të luajë miqësore në Gjermani. Nuk më pëlqen kjo situatë. Kam folur hapur me të dhe i kam rekomanduar, derisa situata të zgjidhet, të bëjë punën e tij dhe të sillet në mënyrë profesionale. Por ai tha se nuk është në gjendje mendërisht për ta bërë këtë. Çfarë mund të bëj? Nuk mund të thërras policinë për ta detyruar të stërvitet.”
