Pervis Estupinan, 27 vjeç, mbrojtës i majtë (ose edhe mesfushor i krahut të majtë) është futbollisti që Milani ka zgjedhur për të mbushur vendin bosh pas shitjes së Theo Hernandez te Al-Hilal. Futbollisti ekuadorian do të vijë nga Brighton për një shumë (shuma varion mes 15/20 milionë me bonuse të përfshira) dhe një pagë të përballueshme (2.5 milionë neto në sezon për 4 vitet e ardhshme, shumë më e ulët krahasuar me sa fiton aktualisht).
Mbi shpinë mban nofkën “la bala” (plumbi) që e shpjegon mirë se shpejtësia (arrin 25 km/h) është një nga cilësitë më të mira të bagazhit të tij teknik për sa i përket shtytjes në sulm, aftësisë atletike dhe një fiziku mjaftueshëm të qëndrueshëm pavarësisht një dëmtimi në kyçin e këmbës dhe një tjetri muskulor (në sezonin e kaluar ka munguar në 22 ndeshje) përveç një problemi të mëparshëm, po muskulor, që daton 2 vite më parë (21 ndeshje të munguara).
Lexo më tej: Vlahovic-Milan: Furlani i jep dritën jeshile Tares, por duhet zbritje e madhe çmimi
De Zerbi, që e ka stërvitur në Premier League, e përshkroi kështu: “E nisi si mbrojtës i majtë por mund të mbulojë edhe pozicionin e sulmuesit. Nëse përmirëson kontrollin e parë dhe pasimet, besoj se mund të bëhet një nga më të mirët në botë në rolin e tij”. Me fanellën e Seagulls (pulëbardhat, është nofka e Brighton) ka zhvilluar 104 ndeshje, ka shënuar 5 gola, ka dhënë 14 asiste.
Estupinan nuk është një risi për Serie A-n, ky do të jetë një rikthim i tij në Itali pasi kishte bërë vetëm një paraqitje të shkurtër te Udinese që në vitin 2016 e solli në Friuli përpara se të niste vargun e transferimeve me ndalesa te Granada, Watford (në Angli, ish-klubi i familjes Pozzo), Almeria, Mallorca, Osasuna, Villarreal dhe, më në fund, klubi britanik.
Shifrat e marrëveshjes së Milanit për Estupinan: kontrata dhe paga
Cila është vlera e tregut e Estupinan? Sipas faqes së specializuar Transfermarkt, kuotimi aktual sillet rreth 30 milionë euro, një shumë e përcaktuar edhe nga zgjatja aktuale e kontratës me Brighton që skadon në 2027. Qëllimi i klubit anglez është i qartë: të përfitojë sa më shumë nga largimi i futbollistit. Prandaj Milan (por edhe Manchester United është në gjurmët e tij) e kanë të qartë se vlera e kartonit është 23 milionë, të cilat kuqezinjtë do të provojnë t’i ulin.
Tare mendon të paraqesë një ofertë (maksimumi 20 milionë përfshirë stimujt) që i afrohet shumë kërkesës por e përshtatur duke marrë parasysh edhe bonuset dhe faktorë të tjerë si mënyra e pagesës. Operacioni është drejt finalizimit edhe falë marrëveshjes që “djalli” duket se ka arritur me lojtarin: kontratë 4-vjeçare (me opsion për një vit tjetër) me pagë neto 2.5 milionë euro, pak më e ulët krahasuar me rreth 3 milionët që ka përfituar deri tani.
Shiste “empanada” për të blerë atlete futbolli
I parafundit nga pesë vëllezër, historia e Estupinan është shumë e ngjashme me atë të lojtarëve të tjerë që ia dolën pavarësisht kushteve të vështira të familjes. Ëndrrën për t’u bërë futbollist e ndërtoi nga zero, duke vënë zemrën në atletet që i bleu duke shitur empanada (byrekë të vegjël të mbushur, tipikë të kuzhinës latino-amerikane dhe spanjolle) ose duke mbledhur topat në një klub lokal tenisi. El Nacional dhe LDU Quito janë skuadrat ku u dallua në vendlindje përpara se të vinte mundësia e madhe e futbollit europian.
