Në Nion të Zvicrës u zhvillua sot shorti për turin e tretë kualifikues të UEFA Conference League, duke përcaktuar rivalët e mundshëm për tre përfaqësueset shqiptare, të cilat janë ende në garë për të siguruar një vend në fazat e mëtejshme. Egnatia, Vllaznia dhe Dinamo City tashmë e dinë se me cilat skuadra do të përballen, nëse arrijnë të kalojnë me sukses pengesën e turit të dytë.
Kampionia aktuale e Shqipërisë, Egnatia, duhet fillimisht të eliminojë Dinamo Minsk për të siguruar një vend në turin tjetër. Nëse ja del mbanë, do të ketë përballë fituesin mes Olimpija Ljubljana nga Sllovenia dhe Inter Escaldes nga Andorra. Në letër, një kundërshtar më i favorshëm krahasuar me alternativat e tjera që mund të kishte përballë.
Edhe Vllaznia ka një shans të mirë për të avancuar më tej. Shkodranët, që aktualisht luajnë kundër Víkingur Reykjavík në turin e dytë, në rast se fitojnë, do të masin forcat me skuadrën që del fituese nga dueli mes H. Bóltfelag të Ishujve Faroe dhe Brøndby nga Danimarka. Për Vllazninë, një rrugë që mund të jetë e kalueshme, por që kërkon paraqitje bindëse në të dyja sfidat.
Lexo më tej: Lamtumirë Champions, Egnatia turpërohet në Islandë: gafa amatore, 5-0 e Breidablik
Ndërkohë, më e vështira duket rruga për Dinamo City. Kryeqytetasit duhet fillimisht të kalojnë Atletic Escaldes nga Andorra. Nëse arrijnë të sigurojnë biletën për turin e tretë, do t’u duhet të përballen me një rival shumë më të fortë: fituesin e ndeshjes mes Zire nga Azerbajxhani dhe Hajduk Split, një prej emrave më të njohur në arenën ballkanase dhe jo vetëm. Për Dinamon, ky mund të kthehet në një test të vërtetë force dhe ambicieje.
Sipas kalendarit të përcaktuar nga UEFA, ndeshjet e para të turit të tretë do të zhvillohen më 7 gusht, ndërsa sfidat e kthimit do të luhen një javë më vonë, më 14 gusht. Tani mbetet që ekipet shqiptare të bëjnë detyrën në raundin e dytë dhe të synojnë të shkruajnë një faqe të re europiane.
