Përsëri probleme për Paul Gascoigne, i përballur me episodin e radhës dramatik të jetës së tij. Aq i talentuar në fushë ish-futbollisti i Lazios dhe i kombëtares angleze, sa i brishtë dhe pre e demonëve të tij jashtë fushës së lojës. Gascoigne, sot 58-vjeçar, u gjet i rrëzuar, në gjendje gjysmë të pandërgjegjshme, nga një mik i tij në dhomën e gjumit të shtëpisë së tij në Poole, në jugun ekstrem të Anglisë. ‘Gazza’ u shtrua në terapi intensive të premten në mbrëmje, por tani është transferuar në një njësi të mjekësisë urgjente, ku gjendja e tij përshkruhet si e qëndrueshme.
Është ‘Sun’ që e përhap lajmin dhe raporton fjalët e mikut Steve Foster. Personi që e gjeti dhe e ndihmoi ka thënë se Gascoigne do të donte “të falënderonte të gjithë për mbështetjen e marrë nga shumë miq të vjetër që i urojnë më të mirën dhe duan ta shohin të rikthehet në gjendjen më të mirë”. Një urim ky i fundit që është shprehur shumë herë nga ata që e duan Paulin, por që është treguar një iluzion, pasi periodikisht vijnë lajme për rikthime të ish-futbollistit, i cili edhe vitin e kaluar kishte rrëfyer se kishte filluar sërish të frekuentonte mbledhjet e Alkolistëve Anonimë.
Paul Gascoigne është në spital në gjendje të qëndrueshme
Aktualisht jashtë rrezikut pas frikës së madhe, Gascoigne është në konvaleshencë në një spital pranë shtëpisë së tij dhe pritet të qëndrojë atje për disa ditë për të marrë kujdesin e nevojshëm. Foster, i cili është gjithashtu shofer dhe asistent personal i Paulit, e kishte çuar atje me ngut pasi e kishte gjetur në dhomën e tij të gjumit. “Është në spital, që është vendi më i mirë ku mund të jetë për momentin”, ka shpjeguar ai.
Sipas asaj që ka mësuar ‘Sun’, vajza e tij Bianca, dy motrat e tij dhe ish-miqtë futbollistë Peter Beardsley, Chris Waddle, Paul Merson dhe Vinnie Jones janë informuar menjëherë për gjendjen e tij.
Në fillim të korrikut u anulua dhe u shpërbë kompania personale e Gascoigne
Kjo frikë e radhës për shëndetin e Gascoigne vjen menjëherë pas momentit të fundit të vështirë të përjetuar në planin personal nga ish-mesfushori i Newcastle, Tottenham, Lazio dhe Rangers: në fillim të korrikut kompania e tij u mbyll sepse nuk arriti të paraqiste dokumentet në kohë. ‘Companies House’ britanike kishte njoftuar se shoqëria ishte anuluar dhe shpërbërë.
Paul kishte themeluar ‘Gazza8 Limited’ në vitin 2019 për të kanalizuar të ardhurat që vinin nga paraqitjet televizive, dokumentarët dhe një film i planifikuar për jetën e tij. Seria e parë e të dhënave financiare të shoqërisë duhej të paraqitej deri më 26 tetor 2021, por Gascoigne nuk ka paraqitur asnjë dokumentacion që nga themelimi i saj. Gazza ishte i vetmi administrator i shoqërisë me seli në Dorset dhe zotëronte të gjitha aksionet. Më parë kishte refuzuar pesë përpjekje për ta mbyllur institucionin për mosparaqitje dokumentesh. Kësaj here nuk pati asgjë për të bërë. Sa kjo ka të bëjë me ngjarjen dramatike të orëve të fundit është ende për t’u kuptuar.
