Një koncert i planifikuar në Itali nga dirigjenti i njohur rus Valery Gergiev, i njohur për lidhjet e tij të ngushta me presidentin Vladimir Putin, është anuluar pas protestave të gjera publike.
Gergiev, një mbështetës i hapur i Putinit, kishte planifikuar të drejtonte një orkestër lokale më 27 korrik në festivalin muzikor “Un’Estate da Re”, që mbahet në Reggia di Caserta, një pallat historik pranë Napolit dhe një nga vendet e trashëgimisë botërore të UNESCO-s. Menaxheri i pallatit njoftoi të hënën, përmes një deklarate të shkurtër, se performanca ishte anuluar.
Ky do të ishte koncerti i parë i Gergiev në Evropë që prej fillimit të pushtimit të plotë rus në Ukrainë në shkurt të vitit 2022. Performanca ishte mbështetur nga Vincenzo De Luca, presidenti rajonal i Kampanjes nga krahu i majtë, ndërsa autoritetet rajonale ishin organizatorët dhe financuesit e festivalit – një nga ngjarjet kulturore më të rëndësishme të verës në Italinë jugore.
Anulimi vjen pas një peticioni të nënshkruar nga mbi 16,000 persona – përfshirë laureatë të Çmimit Nobel, politikanë dhe aktivistë – drejtuar De Lucës dhe presidentes së Komisionit Evropian, Ursula von der Leyen, ku bëhej thirrje për anulimin e koncertit.
Yulia Navalnaya, e veja e opozitarit rus Alexei Navalny, i cili vdiq vitin e kaluar në një burg në Arktik, kritikoi ashpër koncertin përmes një artikulli në La Repubblica. Ajo e cilësoi performancën si “një dhuratë për diktatorin” dhe përshkroi Gergiev si jo vetëm “mik të dashur” të Putinit, por edhe “promovues” të politikave të tij kriminale.
Ngjarja shkaktoi përplasje politike mes De Lucës dhe ministrit italian të kulturës, Alessandro Giuli. “Arti është i lirë dhe nuk mund të censurohet,” tha Giuli për agjencinë Ansa. “Megjithatë, propaganda, edhe kur shfaqet me talent, është diçka tjetër.”
Vendimi për anulim u mirëprit nga kritikët. Zëvendëspresidentja e Parlamentit Evropian, Pina Picierno, një nga nënshkrueset e peticionit, shkroi në rrjetet sociale: “Ne shpjeguam, luftuam dhe fituam!”
Riccardo Magi, lider i partisë së majtë “Më shumë Evropë”, e quajti koncertin e mundshëm të Gergiev “një poshtërim të patolerueshëm për viktimat e luftës brutale të Putinit kundër Ukrainës”.
Gergiev ka qenë prej vitesh një figurë kulturore me ndikim në Rusi dhe ka shfaqur hapur mbështetjen për Putinin – përfshirë pjesëmarrjen në një reklamë të fushatës së tij në vitin 2012, përkrahjen ndaj aneksimit të Krimesë më 2014 dhe drejtimin e një koncerti patriotik në Palmirë të Sirisë në vitin 2016, pas ndihmës së trupave ruse për rimarrjen e qytetit nga regjimi i Assadit.
Pas pushtimit të Ukrainës, Gergiev është larguar nga disa institucione dhe festivale prestigjioze evropiane, përfshirë Teatrin La Scala të Milanos, për shkak të refuzimit për të dënuar veprimet e Putinit. Herën e fundit që ai performoi në Itali ishte më 23 shkurt 2022, vetëm disa orë para fillimit të pushtimit.
Agjenti amerikan i Gergiev nuk ka komentuar ende në lidhje me anulimin.
