Alisha Lehmann lëviz në Europian me truprojë, por te Zvicra nuk luan kurrë: çfarë bën

Zvicra është kthyer në një nga surprizat e mëdha të këtij Europiani në shtëpi dhe nesër do të luajë për të siguruar hyrjen në gjysmëfinale kundër Spanjës. Vajzat e Pia Sundhage janë befasuese, por shumë tifozë kanë mbetur të zhgënjyer nga roli dytësor që po ka Alisha Lehmann: lojtarja e Juves nuk ka nisur kurrë si titullare dhe ka luajtur vetëm disa minuta të numëruara, por brenda dhomave të zhveshjes është një nga figurat më autoritare, shtylla mbi të cilën mbështetet i gjithë ekipi. Edhe pse në pamje të parë mund të duket e çuditshme, zvicerania është realisht lidhja që bashkon të gjithë grupin dhe roli i saj është të mbajë fjalime motivuese para ndeshjeve. Sipas gazetës zvicerane Blick, është një rol që i përshtatet për mrekulli dhe edhe futbollistet e tjera janë të habitura nga rëndësia dhe ndikimi që ka tek ato. Gjithçka ka nisur rastësisht, por në Europian fjalimi i saj është kthyer pothuajse në një ritual para se të zbresin në fushë. Jehona mediatike që e shoqëron edhe në këtë turne e ka bërë Zvicrën t’i caktojë një truprojë personale: nuk lëviz kurrë e vetme pikërisht për shkak të popullaritetit të saj që në këtë rast mund t’i sjellë edhe ndonjë situatë të pakëndshme.

Roli i ri i Alisha Lehmann në Zvicër

Duke parë nga jashtë turneun e futbollistes lexohet vetëm shumë zhgënjim. Në tre ndeshjet e para të fazës në grupe Pia Sundhage i ka dhënë vetëm 9 minuta në ndeshjen kundër Finlandës, duke e lënë vazhdimisht në stol gjatë gjithë kohës. Lehmann është dashur të kënaqet me një minutazh të reduktuar, por në realitet ka marrë një rol shumë të rëndësishëm për Zvicrën: është motivuesja e skuadrës, profili që di të mbajë të bashkuar gjithë ambientin dhe të bëjë që kombëtarja të japë maksimumin edhe përballë gjigantëve. Kjo ndodhi për herë të parë vetëm pak minuta para miqësores kundër Çekisë, me një fjalim aq të ndjerë sa ngarkoi ekipin duke i dhënë përgjegjësi secilës nga futbollistet. Ato e përballuan ndeshjen me grintë dhe për këtë arsye trajnerja i la lojtare­s së Juventusit rolin e kapitenes pa shirit, një barrë e madhe që ajo e mban edhe në Europian pavarësisht aktivizimit të pakët në fushë. Edhe pse nuk luan kurrë (konkurrenca është e madhe dhe sezoni i fundit te Juve nuk ka qenë aspak pozitiv) vëmendja e tifozëve është e gjitha tek ajo: e pashmangshme, duke parë një profil Instagram me 17 milionë ndjekës dhe një popullaritet në rritje edhe përtej botës së sportit.

 

View this post on Instagram

 

A post shared by Alisha Lehmann (@alishalehmann7)