Problemet për klubin legjendar të futbollit portugez, Boavista, vazhdojnë pa pushim. Së fundmi Boavista ka qenë e detyruar të shpallë falimentin, duke u përjashtuar nga futbolli profesionist për shkak të problemeve të mëdha financiare. Në mëngjesin e së martës, më 15 korrik, Policia Gjyqësore u detyrua të hapte me forcë dyert hyrëse të selisë së klubit brenda Stadiumit Bessa XXI, pasi disa persona, të mbyllur brenda, kishin refuzuar të jepnin çelësin për të hyrë. Momente tensioni pasuan ndërhyrjen e disa agjentëve civilë, të cilët sekuestruan dokumente dhe materiale informatike.
Boavista, ndërhyrja e Policisë Gjyqësore në seli
Policia, pas kolapsit financiar të shoqërisë portugeze që po përpiqet të nisë nga e para nga kategoritë më të ulëta, amatore, po heton disa raste korrupsioni dhe menaxhimi mashtrues që çuan në falimentimin e saj: “Policia gjyqësore ka kryer dhjetë urdhra kontrolli në kuadër të një hetimi për ngjarje të ndodhura midis vitit 2023 dhe fundit të vitit 2024” bënë të ditur autoritetet e Portos “dhe që kanë përfshirë një grup shoqërish të lidhura me botën e sportit, me përfitime të paligjshme të vlerësuara në rreth 10 milionë euro”.
Dokumente të sekuestruara: akuza për mashtrim e pastrim parash
Gjatë hetimeve, gjashtë persona fizikë dhe juridikë janë akuzuar për pastrim parash, mashtrim fiskal të rënduar dhe falimentim mashtrues. Këto vepra penale janë kryer nga anëtarë të drejtuesve, kontabilistë, një studio ligjore dhe një shoqëri auditimi ligjor që kujdesej për financat e klubit Boavista. Menjëherë pas ndërhyrjes në selinë e klubit, u sekuestruan gjithashtu disa dokumente dhe pajisje informatike, siç kanë konfirmuar mediat portugeze.
Boavista, pa para dhe garanci, do ta nisë nga amatorët
Pasi ka luajtur në kategorinë e parë dhe është rrëzuar, Boavista nuk kishte paraqitur në kohë dokumentet e nevojshme për t’u regjistruar dhe për të luajtur në Kategorinë e Dytë. Jo vetëm kaq: klubi paraqiti arka bosh dhe borxhe të mëdha për t’u shlyer. Në fund, pavarësisht një shtyrjeje tjetër, nuk paraqiti as garancitë për t’u futur në të tretën. Klubi do të nisë eventualisht mes amatorëve, në kategorinë e pestë portugeze.
