Kjo do të jetë finalja e parë në një turne të madh ndërkombëtar mes një skuadre angleze dhe një franceze. Chelsea dhe Paris Saint-Germain do të përballen për herë të parë që nga 1/8 e finales së UEFA Champions League 2015/16, ku skuadra franceze i fitoi të dyja ndeshjet dhe kaloi fazën me rezultatin total 4-2. Më parë, Blues kishin humbur vetëm një nga gjashtë ndeshjet e luajtura kundër PSG (2 fitore, 3 barazime).
Kjo do të jetë ndeshja e tetë e PSG kundër skuadrave angleze që nga fillimi i vitit 2025, pas pesë fitoreve dhe dy humbjeve në Champions League kundër klubeve britanike këtë vit. Paris Saint-Germain do të bëhet skuadra e tretë (jashtë Mbretërisë së Bashkuar) që luan tetë ndeshje kundër skuadrave angleze brenda një viti kalendarik, pas Reggiana në 1978 dhe Bayer Leverkusen në 2002.
Seri pozitive
Chelsea ka fituar pesë finalet e fundit ndërkombëtare (përjashtuar Superkupat) që nga viti 2013, përfshirë fitoren 4-1 kundër Real Betis në finalen e UEFA Conference League majin e kaluar. Humbja e fundit e Chelsea në një finale ndërkombëtare daton në pjesëmarrjen e parë të Blues në Kupën e Botës për Klube të FIFA-s (0-1 kundër Corinthians në 2012). Chelsea nuk ka pësuar gol në pjesën e parë në Kupën e Botës për Klube FIFA 2025. Blues kanë pësuar vetëm 0.85 Expected Goals kundër në pjesët e para të lojës, më pak se çdo skuadër tjetër e turneut, megjithëse kanë luajtur gjashtë ndeshje.
Që nga finalja e Kupës së Francës, Paris Saint-Germain ka fituar pesë ndeshjet e fundit të luajtura në fazat me eliminim direkt me një rezultat total 18-0 (10-0 në këtë fazë të Kupës së Botës për Klube FIFA). Për më tepër, 16 golat e PSG në këtë turne janë një rekord absolut në një sezon të vetëm në historinë e turneut.
Golat e shënuar
Paris Saint-Germain ka shënuar 10 gola në pjesën e parë të Kupës së Botës për Klube FIFA 2025 – përfshirë tre të realizuar kundër Real Madrid në gjysmëfinale – dhe vetëm Bayern Munich (11) ka shënuar më shumë në 45 minutat e para të lojës në turneun aktual. Në veçanti, PSG ka gjeneruar 5.85 Expected Goals para pushimit, më pak vetëm se Manchester City (6.18). Dhjetë golat e fundit të Chelsea në Kupën e Botës për Klube FIFA 2025 (përjashtuar autogolat) janë shënuar nga nëntë lojtarë të ndryshëm, me vetëm João Pedro (dopietë në fitoren gjysmëfinale kundër Fluminense) që ka më shumë se një gol të shënuar nga ndeshja e fundit e fazës së grupeve e Blues e tutje.
Lojtarët protagonistë
Enzo Fernández ka qenë lojtari që ka dhënë më shumë asistime në Kupën e Botës për Klube FIFA 2025 (tre); për më tepër, që nga fillimi i vitit 2025, asnjë lojtar i Premier League nuk ka dhënë më shumë pasime decizive në të gjitha kompeticionet sesa lojtari i lindur më 2001 (nëntë, njësoj si Morgan Rogers dhe Anthony Elanga).
Ousmane Dembélé ka shënuar një gol dhe ka dhënë një asistim në gjysmëfinalen kundër Real Madrid, në ndeshjen e tij të parë si titullar në këtë Kupë të Botës për Klube FIFA. Deri më tani, që nga fillimi i vitit 2025, Dembélé ka kontribuar në 30 gola (22 gola + 8 asistime) në 23 ndeshje si titullar në të gjitha kompeticionet.
Vitinha ka kompletuar të paktën 100 pasime në pesë ndeshje në Kupën e Botës për Klube FIFA 2025, dhe lojtari i vetëm tjetër që ka kompletuar 100+ pasime në më shumë se një ndeshje të turneut aktual ka qenë kundërshtari i ditës Tosin Adarabioyo i Chelsea (dy herë).
João Pedro ka shënuar shtatë gola në nëntë paraqitjet e fundit si titullar në të gjitha kompeticionet mes Brighton dhe Chelsea, përfshirë një dopietë në debutimin e tij si titullar me Blues në gjysmëfinale kundër Fluminense. Lojtari i fundit që ka shënuar dy ose më shumë gola në secilën nga dy paraqitjet e tij të para si titullar me një klub të Premier League ka qenë Gabriel Martinelli, mes shtatorit dhe tetorit 2019 me Arsenal.
Lexo më tej: PSG i merr të gjitha: deri në 300 milionë të ardhura nga Champions dhe Botërori
Megjithëse ka filluar vetëm 26 nga 41 ndeshjet e PSG në 2025, Bradley Barcola ka regjistruar 18 asistime këtë vit kalendarik: katër më shumë se çdo lojtar tjetër i një skuadre të Top-5 kampionateve evropiane (mesatare një asistim çdo 129 minuta që nga janari).
Vetëm dy lojtarë kanë krijuar më shumë raste nga loja në Kupën e Botës për Klube FIFA 2025 sesa Cole Palmer (nëntë), i cili në gjysmëfinalen kundër Fluminense i dha shokëve të ekipit tre raste për goditje, duke kompletuar të 27 pasimet e tentuara në ndeshje. Lojtari i lindur më 2002 u bë kështu lojtari i dytë në turne me të paktën tre raste të krijuara dhe 100% pasime të sakta në një ndeshje (20+ të tentuara), së bashku me Rayan Aït-Nouri në Juventus-Manchester City 2-5.
