Këtë 1 korrik u bënë 98 vite nga vdekja e Shote Galicës, një prej heroinave më të mëdha të kombit shqiptar dhe simbol i rezistencës kundër pushtuesve të huaj në fillim të shekullit të 20-të.
Emri i vërtetë i saj ishte Qerime Radisheva. Ajo lindi në fshatin Radishevë të Drenicës dhe u martua me Azem Galicën në vitin 1915. U dallua për rolin e saj në Kryengritjen e Dukagjinit dhe Junikut (1921-1923).
Pas vdekjes së burrit të saj në vitin 1925, Shota mori drejtimin e luftës dhe luftoi së bashku me Bajram Currin në rajonet e Hasit, Prizrenit dhe Lumës.
E njohur për trimërinë dhe guximin e saj, ajo arriti të kapte një komandant serb dhe një numër ushtarësh në Çikatovë, duke dëshmuar aftësitë e saj të jashtëzakonshme luftarake.
Në korrik të vitit 1927, Shote Galica u tërhoq në Shqipëri dhe kaloi muajt e fundit të jetës në Fushë Krujë, ku ndërroi jetë në moshën vetëm 31-vjeçare.
Shote Galica ishte një legjendë në kohën e saj, duke luftuar heroikisht për 12 vjet rresht kundër pushtuesve serbë, austrohungarezë dhe bullgarë, pa u ndalur nga terrori, ligjet e ashpra fetare apo kanuni. Ajo mbahet mend për thënien e saj të njohur: “Jeta pa dije është si një luftë pa armë.”
Ajo e mbylli jetën në kushte shumë të rënda dhe në harresë totale, duke u përballur me sëmundje, varfëri dhe braktisje. Në një letër prekëse dërguar Ahmet Zogut, Shote Galica shkruante: ”Unë jam Shote Galica, gruaja e Azem Galicës, prijësit të Lëvizjes Kaçake të Kosovës.
Kam edhe katër fëmijë jetimë me vedi, janë fëmijët e luftarëve të vramë për çlirim të Kosovës. Jam e shtrëngueme t’ju vnoj në dijeni se jam tuj vdekë unit bashkë me fëmijët jetim”.
Megjithatë, ndihma nuk i erdhi kurrë heroinës shqiptare. Në kushtet më të vështira ekonomike, Shote Galica u detyrua të shesë edhe kalin e saj – një dhuratë e çmuar nga burri i saj Azemi, i cili shërbente si simbol dhe ndihmë për të siguruar jetesën e fëmijëve jetimë.
Kjo histori e dhimbshme rikthen në vëmendje sakrificat e jashtëzakonshme të Shote Galicës, e cila luftoi heroikisht për lirinë e Kosovës, por u braktis në nevojë nga ata që duhet ta mbështesnin. /LAPSI.al
