Një palmë është rrëzuar papritur në mes të rrugës sot në bulevardin “Epidamn” në Durrës, duke rrezikuar kalimtarët dhe drejtuesit e mjeteve që lëviznin në zonë. Fatmirësisht, nuk raportohet për persona të lënduar.
Ngjarja shkaktoi bllokim të përkohshëm të trafikut. Sipas banorëve dhe dëshmitarëve, rrëzimi i pemëve të tilla nuk ndodh për herë të parë në këtë bulevard. Ngjarje të ngjashme janë shënuar edhe më herët, jo vetëm në bulevardin “Epidamn”, por edhe në zona të tjera të qytetit bregdetar.
Banorët kërkojnë që të kryhet një kontroll më i rreptë dhe i rregullt i gjendjes së pemëve dekorative në rrugët e qytetit, për të shmangur rreziqe të tilla për jetën dhe sigurinë publike.
